Avstraliyalik 38 yoshli ayol “hayotidagi eng yaxshi qaror”ni qabul qilib, qariyalar uyiga ko‘chib o‘tdi

38 yoshli avstraliyalik ayol ajrashgandan so‘ng qariyalar uyiga ko‘chib o‘tishga qaror qildi. Bu uning hayotidagi eng yaxshi qaror bo‘ldi. 

Ayol munosabatlar uzilganidan keyin uzoq vaqt davomida hayotini yangidan boshlashga kuch topa olmadi. Avvaliga u kvartirani tark etdi, biroq ikki oydan so‘ng ijarada yashash juda qimmatga tushayotganini anglab yetdi. Keyinchalik u qarindoshi — ammasini ko‘rgani, faqat qariyalar yashaydigan qishloqqa yo‘l oldi. Ayolning ammasi uning gaplarini tinglab, noodatiy yechimni taklif qildi — aynan o‘z qishlog‘iga ko‘chib o‘tishini. Ammasi ayolning yoshi muammo bo‘lmasligiga ishontirdi, shuning uchun ular birga arizani to‘ldirib, topshirishdi.

Hozirda bu avstraliyalik ayol allaqachon bir yildan oshiq vaqt mobaynida qariyalar yashaydigan qishloq aholisi qatorida. Uning aytishicha, bu qaror uning byudjeti uchun eng maqbul bo‘lib chiqqan, chunki bu yerda kichik ikki xonali kvartira narxi Melburn chekkasidagiga qaraganda besh baravar arzon.

Bundan tashqari, ayol bu qishloqdagi hayotni o‘ziga xos terapiya deb atadi, chunki u atrofidagi sokinlik va do‘stona odamlar orasida yashashdan zavqlanmoqda.

Men hech qachon o‘z o‘rnimni topgandek his qilmagandim, lekin hayotni shoshilmay yashaydigan, texnologiyaga berilmagan odamlar orasida o‘tkazish — bu mening ruhiy salomatligim uchun ajoyib. Bu mening boshpanamga aylandi, deydi u.

Qishloqda uning odatiy kuni shunday o‘tadi: tongda sayrga chiqadi, so‘ng yoga mashg‘ulotlariga qatnashadi, velosipedda yuradi, bingo o‘ynaydi va vaqti-vaqti bilan frilanserlik ishlarini bajaradi. Kechqurun esa u yaqin atrofdagi do‘konga yoki tamaddixonaga boradi, pishiriq tayyorlaydi yoki ayvonda o‘tirib, uzoq suhbatlar quradi.

Men bu yerda cheksiz xotirjamlikni topdim, bu esa mukammal hayot degani. 70–80 yoshlarga kirish aslida unchalik yomon emas ekan. Atrofimdagi insonlardan bilib oldimki, istalgan yoshda siz hali ham faol bo‘lishingiz, ko‘ngilli bo‘lib ishlashingiz, yangi do‘stlar orttirishingiz va yangi sevimli mashg‘ulotlarni boshlashingiz mumkin, deydi u.

Shunga qaramay, uning oilasi hali ham bu qarorini qabul qila olgani yo‘q. Ota-onasi uni fikridan qaytarishga va qariyalar uyidan ko‘chib chiqishga undamoqda, biroq 38 yoshli ayol yangi hayot tarzini qabul qilgan va yaqin orada bu joyni tark etishni rejalashtirmayapti.