AQSH prezidenti Donald Tramp ma’muriyati mamlakatga ota-onasi yoki vasiyisiz kelgan muhojir bolalarni zudlik bilan deportatsiya qilishga kirishdi. Bu haqda CNN xabar berdi.
Mamlakat ichki xavfsizlik vakillarining bildirishicha, federal agentlar o‘smirlardan mamlakatni ixtiyoriy ravishda tark etishni xohlash-xohlamasliklarini so‘ramoqda. Yangi siyosat 14 yoshdan 17 yoshgacha bo‘lgan bolalarga amal qilishi bildirilgan.
AQSH Immigratsiya va bojxona nazorati (ICE) xodimlariga bolalarning fikrini o‘rganib, ularni vatanlariga qaytarish vazifasi yuklatilgan. Agar bolalar bunga rozi bo‘lsa, agentlar ularni deportatsiya qilish uchun ICE’ga topshiradi. Biroq ICE bolalarni bojxonadan 72 soat ichida olib ketmasa, agentlar ularni Sog‘liqni saqlash vazirligiga yuboradi.
Tramp ma’muriyati so‘nggi paytlarda deportatsiya siyosatini kuchaytirayotgani ma’lum. Bolalarni deportatsiya qilish ham hukumatning bu boradagi sa’y-harakatlarining navbatdagi bosqichidir. Bu Sog‘liqni saqlash va ijtimoiy xizmatlar departamentiga ham ancha yengillik berishi aytildi.
Ta’kidlash joizki, shu paytgacha AQSH federal hokimiyati faqatgina Meksika va Kanadadan kelgan hamrohsiz bolalardan mamlakatni tark etish fikrlarini so‘ragandi. Boshqa mamlakatlarga bunday “imtiyoz” oldin berilmagan.
“Hamrohsiz chet ellik bolalarga AQSHga kirish uchun arizani qaytarib olish imkoniyatini berish qarori 2022-yilda qabul qilingan. Bu siyosat ‘Odam savdosining oldini olish va himoya qilishga qayta ruxsat berish to‘g‘risidagi’ qonunda akkreditatsiyadan o‘tgan”, dedi Ichki xavfsizlik vazirligi matbuot kotibi.
Izoh (0)