Braziliya tashqi ishlar vazirligi mamlakat Isroilga qarshi Xalqaro jinoiy sudga kiritilgan da’vo ishiga rasman qo‘shilishga tayyorgarlik ko‘rayotganini bildirdi. Mazkur ariza Janubiy Afrika Respublikasi tomonidan 2023-yilda kiritilgan edi.
Mamlakat yahudiy davlatini 1948-yilgi Genotsid konvensiyasini buzishda ayblab sudga murojaat qilgan. Unda Isroil armiyasining G‘azodagi harbiy amaliyotlari tinch aholiga nisbatan keng ko‘lamli hujum ekani aytilgan, xususan maktablar, shifoxonalar, lagerlar va boshpanalar qasddan nishonga olingani ta’kidlagan edi.
Isroilga qarshi mazkur da’vo ishiga qo‘shilish niyatini avvalroq Ispaniya, Turkiya va Kolumbiya ham ma’lum qilgan. Braziliya hukumati tomonidan e’lon qilingan bayonotda Isroil xalqaro huquq normalarini buzayotgani qayd etilgan. Qolaversa, G‘azoda tinch aholiga qarshi zo‘ravonlik holatlaridan “chuqur norozilik” bildirilgan.
Tel-Aviv esa bunday ayblovlarni rad etib, uning maqsadi HAMAS harakatini yo‘q qilish bilan cheklanishini iddao qilgan. Isroilning Braziliyadagi elchixonasi masala yuzasidan izoh bermadi. Braziliya—Yahudiy milliy assotsiatsiyasi esa qarorni “Isroil bilan uzoq yillik do‘stlikni buzuvchi va tashqi siyosatdagi ekstremizmni ko‘rsatuvchi noto‘g‘ri qadam” deb atadi.
Prezident Lula da Silva Isroilning G‘azodagi amaliyotlarini uzoq vaqtdan beri tanqid qilib keladi. Bu qaror, ayniqsa, AQSH bilan munosabatlar keskinlashgan bir paytda e’lon qilindi. Prezident Donald Tramp shu oy Braziliya mahsulotlariga 50 foizlik boj joriy etganini bildirgan edi.
AQSH Janubiy Afrikaning Isroilga qarshi da’vosini sobiq prezident Bayden davrida ham qo‘llab-quvvatlamagan. Amaldagi prezident esa Oq uyga qaytganidan bir oy o‘tib Janubiy Afrika Respublikasiga moliyaviy yordamni qisqartirish bo‘yicha farmon imzolagan.
Izoh (0)