Xanti-Mansiysk avtonom okrugi dumasi Rossiya Federatsiyasi kommunistik partiyasi fraksiyasi a’zosi Xolid Tagi-Zadeni maoshidan mahrum etdi. U mintaqani o‘zbeklarning “tarixiy vatani” deb ta’kidlagan edi.
Ma’lum qilinishicha, Yugra dumasining 3-iyul kungi majlisida “Deputatlik faoliyatini doimiy professional asosda amalga oshirishni to‘xtatish to‘g‘risida”gi qaror loyihasi ko‘rib chiqilgan. Dumaning ijtimoiy rivojlanish qo‘mitasi raisi Vasiliy Filippenkoning tushuntirishicha, Tagi-Zadeni okrug parlamenti va qo‘mita majlislarini o‘tkazib yuborgani, shuningdek, amalda deputatlik vazifalarini bajarmayotgani sababli maoshidan mahrum etish mo‘ljallanmoqda.
“Hech kimni haqorat qilish niyatim yo‘q edi... Men shunchaki hamma ham byudjetga yopishib olish uchun kelmasligini aytmoqchi edim. Mening fikrimcha, odamlar ehtimol yaxshi niyat bilan kelishayotgandir, umumiy madaniyat, umumiy tarix mavjudligi, ular Rossiyaning bir qismi bo‘lishni istashlari, o‘zlarini mamlakatimizga yaqin his qilishlari mumkin. Ba’zi odamlar, hammasi emas. Men bu yurtni sevaman, bu yerda 40 yildan beri yashayapman. Men xalqimizni, bu yerda istiqomat qiluvchi barcha xalqlarni hurmat qilaman”, dedi Tagi-Zade ovoz berishdan oldingi nutqida.
Duma raisi Boris Xoxryakov o‘z navbatida, qaror bevosita o‘sha shov-shuvli ibora bilan bog‘liq emasligini ta’kidlagan.
Ovoz berish natijasiga ko‘ra, Xolid Tagi-Zadeni deputatlik maoshidan mahrum qilish yuzasidan 32 deputat rozilik bildirgan, bittasi qarshi chiqqan, yana besh nafari ovoz berishda ishtirok etmagan.
Okrug parlamenti matbuot xizmatining ma’lum qilishicha, doimiy professional asosda deputatlik faoliyatini amalga oshirishning to‘xtatilishi Tagi-Zadeni faqat maoshidan mahrum qiladi, lekin mandatidan emas. U ijtimoiy rivojlanish qo‘mitasi tarkibida ishlashni davom ettiradi.
30-may kuni ijtimoiy tarmoqlarda Rossiya Federatsiyasi kommunistik partiyasidan saylangan Xanti-Mansi avtonom okrugi dumasi deputati parlament yig‘ilishida okrugni “o‘zbeklarning tarixiy vatani” sifatida ko‘rish mumkinligini bildirgani haqida videolar tarqaldi.
Ma’lum qilinishicha, Xanti-Mansi avtonom okrugi dumasi majlisida parlament a’zolari o‘rtasida mahalliy xalqlarning tug‘ilishi va o‘limi haqida munozara yuz bergan. Rossiya Federatsiyasi kommunistik partiyasidan saylangan deputat Xolid Tagi-Zade o‘zbekistonlik muhojirlar XMMOga “o‘zlarining tarixiy vataniga” qaytayotganini aytib, hamkasblariga Sibir xonligi tarixini eslatgan.
“Migrantlar ham turli xil bo‘ladi. Masalan, o‘zbeklarga kelsak: Yugra va Tyumen viloyatining bir qismi tarixan Sibir xonligi edi. Ma’lumki, Ko‘chimxon so‘nggi hukmdor bo‘lgan. U esa shayboniylar sulolasiga mansub. Mana shu shayboniylar sulolasi — Buxoro xonligidan chiqqan hukmron o‘zbek sulolasi hisoblanadi. Ehtimol, muhojirlar bu yerga o‘zlarining tarixiy vataniga kelayotgandek kelishayotgandir?”, dedi deputat majlis davomida.
Duma raisi bunga javoban Tagi-Zadening yana bir muhimroq masalaga qaytishini so‘ragan.
Izoh (0)