Eron, AQSH va Isroil hujumlari natijasida ko‘rilgan zararga qaramay, yana bir necha oy ichida uran boyitish jarayonlarini qayta tiklashga qodir bo‘ladi. Bu haqda Xalqaro atom energetikasi agentligi (MAGATE) bosh direktori Rafael Grossining CBS News’ga bergan izohiga tayanib, Al Arabiya telekanali ma’lum qildi.
Yahudiy davlati joriy yilning 13-iyun kuni Eron yadro va harbiy obyektlariga zarba berib, bundan maqsad Tehron yadroviy qurolga ega chiqishining oldini olish ekanini da’vo qilgan edi. Keyinroq mojaroga Qo‘shma Shtatlar ham tortilib, AQSH samolyotlari o‘nlab metr yer ostidagi Fordo inshootiga zarba berishda qo‘llanildi. Eron esa, o‘z navbatida, ommaviy qirg‘in quroliga ega chiqish niyati yo‘qligini ta’kidlab keladi.
Eron yadroviy dasturining hujumlar natijasida ko‘rgan talafotlari haqida ishonchli ma’lumot yo‘q. Mamlakat tashqi ishlar vaziri Abbos Aroqchi yetkazilgan zarar “jiddiy” ekanini bildirgan, biroq tafsilotlarni ochiqlamagan. Oq uy esa hujumlar natijasida Eron yadro dasturi “o‘n yilliklarga ortga surilgani”ni ta’kidladi. Biroq MAGATE rahbari bu fikrga qo‘shilmaydi.
“Ba’zi obyektlar hali ham saqlanib qolgan. Eron bir necha oy ichida yoki undan kamroq vaqtda bir nechta markazdan qochma mashinalarni ishga tushirib, uranni boyitishni boshlashi mumkin”, dedi Grossi.
Kuzatuvchilarni Eron 408,6 kg og‘irlikdagi yuqori boyitilgan uran zaxirasi qiziqtirmoqda. Tehron uni Isroil va AQSH hujumlaridan avval noma’lum nuqtaga ko‘chirganiga ishonishadi.
Manbaga ko‘ra, gap 60 foiz darajada boyitilgan uran haqida ketmoqda. Bu fuqarolik maqsadlarida foydalaniladigan darajadan ancha yuqori bo‘lsa-da, qurol yasash uchun lozim bo‘lgan 60 foizdan ancha kamdir. MAGATE rahbari boyitilgan uran zaxiralari qayerdaligidan boxabar ekanini tan oldi.
“Biz bu material qayerda bo‘lishi mumkinligini bilmaymiz. Bir qismi hujum vaqtida yo‘q qilingan bo‘lishi mumkin, bir qismi esa ko‘chirilgan bo‘lishi mumkin. Bu bo‘yicha aniqlik bo‘lishi shart”, dedi u.
Biroq Isroil va AQSH zarbalaridan so‘ng Eron parlamenti MAGATE bilan hamkorlikni to‘xtatishga ovoz berdi. Shuningdek tashkilot rahbarining zarar ko‘rgan obyektlar, ayniqsa uranni boyitish bo‘yicha asosiy markaz bo‘lgan Fordoga tashrif so‘rovini rad etdi.
Izoh (0)