Rim papasi Lev XIV butun dunyo bo‘ylab mojarolar kuchayib borayotgani, global institutlar suiiste’mollik va harbiy jinoyatlarga to‘lib ketganidan afsusda ekanini bildirdi. U xalqaro huquq hozirda “sharmandali” holatda ekanini ta’kidladi.
“Bugungi kunda xalqaro va gumanitar huquqning kuchi juda zaiflashib qolgan. Uning o‘rnini boshqalarni yengish istagi egallaganini ko‘rish juda achinarli. Bu insoniyat uchun ham, davlat yetakchilari uchun ham nomunosib va sharmandalikdir”, dedi pontifik ijtimoiy tarmoqdagi postida.
Papa o‘z so‘zlariga izoh bermagan. Biroq uning bu gaplari Isroilning G‘azodagi “genotsid”ini to‘xtatishga chaqiruvlar kuchayib borayotgan bir paytda aytilgan. Isroil xalqaro hamjamiyat tomonidan xalqaro gumanitar huquqni buzganlikda bir necha bor ayblangan.
Isroil harbiylari G‘azoning katta qismini yakson qilgan. Uning deyarli barcha aholisi ko‘chirilgan va hududda kamida 56 156 kishi halok bo‘lgan.
Iyun oyi boshida AQSH Davlat departamentining sobiq vakili Metyu Miller Isroil G‘azoda “shubhasiz” harbiy jinoyatlar sodir etganini tan olgan edi. Isroil Xalqaro jinoiy sud tomonidan G‘azo blokadasi va qotilliklar haqidagi rezolyutsiyalarga qarshi chiqqan.
Xalqaro sud 2024-yili Isroilning Falastin hududi — Sharqiy Quddus, G‘arbiy Sohil va G‘azoni bosib olishini noqonuniy deb topib, urushni imkon qadar tezroq tugatishga chaqirgandi. Ushbu sud Isroil bosh vaziri Binyamin Netanyaxu va sobiq mudofaa vaziri Yoav Gallantni G‘azodagi harbiy jinoyatlar, jumladan, urush quroli sifatida ocharchilikdan foydalangani uchun hibsga olishga order bergan.
May oyida, marhum Rim papasi Fransisk o‘rnini egallagan birinchi amerikalik pontifik — Papa Leo XIV – G‘azoga qarshi urushni to‘xtatishga chaqirgan edi.
“Hoziroq o‘t ochishni to‘xtating. G‘azo sektoridan o‘z farzandlarining jonsiz jasadlarini quchoqlab, oziq-ovqat va suvga zor bo‘lib, bombardimonlardan boshpana izlab tinimsiz ko‘chishga majbur bo‘lgan onalar va otalarning faryodlari eshitilmoqda”, degan edi Papa.
Izoh (0)