Sochlaring sog‘lom va chiroyli ko‘rinishi uchun sifatli mahsulotlar ishlatish albatta muhimdir. Ammo, zararli odatlardan voz kechilmasa, eng yaxshi vositalar ham istalgan natijaga erishishga yordam bermaydi. Soch stilistlari fikriga ko‘ra, kundalik hayotimizdagi ba’zi oddiy, lekin xavfli odatlar sochlarning sog‘lig‘iga salbiy ta’sir ko‘rsatadi. Quyida shunday 7 ta tungi odatni ko‘rib chiqamiz.
Nam sochlar bilan yotish
Nam sochlar nozik va zaif bo‘ladi, shuning uchun hammomdan keyin darhol yotish kerak emas. Bu sochlarning shikastlanishiga olib kelishi mumkin. Mashhur soch ustasi Ted Gibsonning aytishicha, tungi yostiqqa ishqalanish natijasida sochlarning qoplamasi (kutikula) qattiqlashib, sochlar quruq va jingalak holga keladi. Shuning uchun yotishdan oldin sochlaringizni yaxshilab quritish tavsiya etiladi.
Sochni quyruq holatida bog‘lab uxlash
Bir joyda rezinkani 24 soat davomida ushlab turish natijasida, aynan o‘sha siqilgan joyda sochlar zararlanadi, mutaxassis Ted Gibson.
Agar siz bo‘sh soch bilan uxlashga qiynalsangiz, taniqli sartarosh Kayli Xit sizga sochni o‘rim qilishni tavsiya qiladi. Birinchidan, bu usul sochga kamroq zarar yetkazadi, ikkinchidan esa, ertalab uyg‘onganda siz allaqachon chiroyli to‘lqinli tayyor soch turmagiga ega bo‘lasiz.
Noto‘g‘ri soch rezinkasidan foydalanish
Sochingizni yig‘ib uxlashni yoqtirasizmi? Ha, bu turmak tez va oson qilinadi, chiroyli ko‘rinadi va deyarli hammaga yarashadi. Ammo Gibsonning fikricha, yig‘ilgan soch uchun to‘g‘ri rezinkani tanlash nihoyatda muhim. Oddiy soch rezinkasi sochning tashqi qatlamini shikastlaydi. Soch uchun xavfsizroq variantlar — bu “prujinkali” (telefon simi shaklidagi) rezinkalar, eng yaxshisi esa atlas yoki ipakdan yasalgan rezinkalardir.
Agar sochlaringiz qalin bo‘lsa yoki sizga mustahkamroq rezinka kerak bo‘lsa, bir nechta kichik ipak soch rezinkalaridan foydalaning, maslahat berdi soch stilisti Mett Nyuman.
Kechqurun sochni taramaslik
Ma’lum bo‘lishicha, bu borada buvilar haq ekan: yotishdan oldin sochni tarash — uzun va sog‘lom sochlar uchun ishonchli usul. Bosh terisi tabiiy yog‘ ishlab chiqaradi, tarash esa uni soch uzunligi bo‘ylab tarqatib, ularni namlaydi. Bundan tashqari, tarash bosh terisi va soch ildizlarini stimulyatsiya qilib, o‘sishga yordam beradi”, — deydi Ted Gibson.
Paxtalik yostiq jildida uxlash
Shoyi va atlas matolar paxtaga nisbatan ancha silliq bo‘ladi va uxlaganingizda sochlarga muloyimroq munosabatda bo‘ladi.
Bunday matolarda ishqalanish deyarli bo‘lmaydi, bu esa sochlar chigal bo‘lib qolishi va sinishining oldini oladi. Agar chiroyli soch turmagini xohlasangiz, o‘zingizni ipak yostiq jildi bilan siylang, maslahat berdi Kayli Xit.
Kechasi sochni namlantirmaslik
Bu foydali maslahat boshini ertalab yuvishga odatlangan har bir kishi uchun juda muhim. Chunki bunday rejim kechasi sochlarni qo‘shimcha parvarish qilish imkonini beradi. Mutaxassis Kayli Xit kechqurun soch uchlariga chuqur ta’sir qiluvchi konditsioner surtishni tavsiya etadi. Uning hamkasbi Ted Gibson esa kokos yog‘idan foydalanishni afzal ko‘radi.
Kokos yog‘i sochning tashqi qatlamiga singib, siz uxlayotgan 8 soat davomida uni oziqlantiradi. Ertalab esa uni yuvib tashlasangiz, silliq va ipakdek jilolangan sochlarga ega bo‘lasiz, deydi Gibson.
Sochga sepilgan lakni yuvmasdan uxlash
Bu sochlaringizni haddan tashqari quritib qo‘yishning bir usuli, deydi Kayli Xit.
Agar kechqurun sochlaringizni yuvib, yaxshi quritishga vaqt topolmasangiz, uxlashdan oldin sochlaringizga konditsioner surtib, yaxshilab tarashingizni mutaxassis maslahat beradi.
Izoh (0)