Olti yoshida dunyodagi eng go‘zal qiz deb tan olingan fransuz modeli Tilan Blondo bugun butunlay boshqacha ko‘rinishga ega. Uning suratlarini Daily Mail nashriyoti eʼlon qildi.
Blondoning karyerasi uch yoshida tasodifiy uchrashuv tufayli boshlangan. Mashhur modelyer Jan-Pol Gotening agenti uni Yelisey maydonida ko‘rib qolib, onasiga murojaat qilgan — qizchaning modellar namoyishida qatnashishini taklif etgan.
Onasi: “Yo‘q, u buni qila olmaydi”, degan. Lekin Jan-Pol Gote: “Qizingiz ertaga, albatta, u yerda bo‘lishi kerak”, deb turib olgan.
Ertasi kuni qizaloq podiumda yura boshlagan.
Yosh modelga haqiqiy shuhrat 2007-yilda, uning Vogue Enfants jurnali muqovasidagi surati o‘quvchilarni maftun etgandan so‘ng keldi. Aynan shu paytdan boshlab uni dunyodagi eng go‘zal qiz deb atay boshlashdi.
Blondoning kattalar olamidagi debyuti 2017-yil fevralida Milandagi moda haftaligida bo‘lib o‘tdi. U yerda Tilan Dolce & Gabbana kolleksiyasini namoyish etdi. Keyinchalik u “eng go‘zal qiz” obrazidan uzoqlashishga intilganini tan oldi.
Bugungi kunda Blondo Miu Miu, Dolce & Gabbana, LʼOréal Paris, Versace, Ralph Lauren va Hugo Boss kabi brendlar bilan hamkorlik qilib, muvaffaqiyatli faoliyatini davom ettirmoqda. U, shuningdek, LʼOréal brendi va fransuz dizayneri Lolita Lempikaning atir-upar reklamasi yuziga aylangan. Yaqinda u o‘zining Enalyht nomli kosmetika va soch parvarish vositalari brendini ishga tushirdi.
Modellik faoliyatidan tashqari, Blondo ijtimoiy tarmoqlardagi o‘z mavqeini faol rivojlantirmoqda. Instagramʼning o‘zida uning 6,9 million nafar kuzatuvchisi bor.
Izoh (0)