Ijtimoiy tarmoqlarning rivojlanishi bizni hayotimizni ochiqchasiga namoyish etishga o‘rgatdi. Mashhurlar uchun esa muxlislari bilan birga suratga tushish kundalik hayotining bir qismiga aylandi. Ammo ayrim taniqli shaxslar selfi surat olishga qat’iy rad javobini beradi. Ular bunday harakatlarini qanday izohlaydi — quyida shu haqda so‘z yuritamiz.
Anna Vintur: hech qachon selfi tushmagan
“Moda qirolichasi” nomini olgan Vogue jurnalining mashhur bosh muharriri Anna Vintur o‘zining noodatiy uslubi bilan ajralib turadi. Uning har bir obrazi eng mayda detalgacha o‘ylangan, tanish bob uslubdagi soch turmagi esa doim ideal holatda turadi. Bunday mukammallik bilan suratga tushishga har kim havas qiladi, biroq Anna bunga hech qachon yo‘l qo‘ymagan.
2014-yilda Vogue jurnali uchun tayyorlangan intervyuda unga 73 ta savol berilgan. O‘shanda u hanuz tugmachali telefon ishlatishini aytgan. Jurnalist selfiga tushishni taklif qilganida, u shunday javob beradi: “Men hali hech qachon selfi qilmaganman va boshlash niyatim ham yo‘q”.
Kim Kardashyan: real hayotdan zavqlanadi
Ijtimoiy tarmoqlar yulduzi, sobiq turmush o‘rtog‘i Kanye Uest bilan birga ko‘plab mojarolar markazida bo‘lgan Kim Kardashyan ilgari “selfi qirolichasi” deb nom olgan edi. U ideal selfi sirlarini o‘rgatuvchi videodarslar tayyorlagan, hattoki bir kunda mingdan ortiq selfi qilishini aytgan. Biroq 2018-yilda u This Morning dasturida barchani hayratga solgan bayonot bilan chiqdi.
“Endi men selfi qilmayman. Aslida, menga ular yoqmaydi. Men bugungi, real hayotim bilan yashayman. Suratga tushishga qarshi emasman, ammo ilgaridek smartfonga qaramlikdan voz kechaman”, dedi u. Shundan so‘ng Kardashyanning ijtimoiy tarmoqdagi sahifalarida ko‘proq oila davrasidagi oddiy suratlar va professional fotosessiyalar paydo bo‘ldi. Selfilar esa ancha kamaydi.
Mayli Sayrus: suratga tushishdan tortinadi
Mashhur pop yulduzi Mayli Sayrus bolaligidan boshlab doim e’tibor markazida bo‘lgan. Ammo ko‘plab suratga olish ishlari va sahnadagi chiqishlar unga kamera oldida erkin bo‘lishga yordam bermagan. Uning muxlislari selfi tushishni so‘raganida hanuz o‘zini noqulay his qilishini tan oladi.
“Men hanuz suratga tushishdan tortinaman, qanday tabassum qilishni bilmayman, o‘zimni doim noqulay his qilaman. Shuning uchun turli qiliqlar qilaman, masalan, tilimni chiqarib turaman. Bu vaziyatni yengillashtiradi va o‘zimga ishonchimni orttiradi”, degan Mayli ABC News nashriga bergan intervyusida.
Emma Uotson: xavfsizlik barcha narsadan ustun
“Garri Potter” franshizasi yulduzi Emma Uotsonga muxlislar tomonidan ko‘rsatilgan e’tibor ko‘pincha chegaradan oshib ketgan. Ko‘plab mojaro va noxush holatlardan so‘ng aktrisa o‘z xavfsizligi uchun qat’iy qoidalar joriy qilgan. Ular orasida begona insonlar bilan selfi tushmaslik talabi ham bor.
“Agar kimdir men bilan suratga tushib, uni ijtimoiy tarmoqqa joylasa, bu ikki soniyada men qayerda ekanligim, nimalar kiyganim va kim bilan yurganim haqida hamma bilib oladi, deganidir. Men bunday shaxsiy ma’lumotni tarqatmaslik tarafdoriman”, degan Emma Vanity Fair jurnaliga bergan intervyusida.
Izoh (0)