Klublar o‘rtasidagi Jahon chempionati 3-turidan o‘rin olgan yana ikki uchrashuv bo‘lib o‘tdi. Musobaqaning A guruhidagi so‘nggi ikki bahs — “Inter Mayami” – “Palmeyras” va “Portu” – “Al-Ahli” jamoalari o‘rtasida kechdi. Har ikki o‘yinda ham jangovar durang natijalari qayd etildi.
“Inter Mayami” – “Palmeyras” uchrashuvi ancha qizg‘in o‘tdi va jamoalar 2:2 hisobida durang o‘ynashdi.
Dastlabki gol 16-daqiqada Tadeo Allende tomonidan kiritildi. 65-daqiqada Luis Suares AQSH klubining ikkinchi golini urib, ustunlikni mustahkamladi. Biroq uchrashuv yakuniga yaqin “Palmeyras” hisobni tenglashtirishga muvaffaq bo‘ldi. Avval 80-daqiqada Paulinyo, so‘ng 87-daqiqada Maurisio raqib darvozasini ishg‘ol qildi. Uchrashuv 2:2 hisobidagi durang bilan yakunlandi.
A guruhining ikkinchi uchrashuvi — “Portu” – “Al-Ahli” bahsi gollarga boy tarzda o‘tdi — 4:4.
Bahdagi hisob 15-daqiqada “Al-Ahli” futbolchisi Abu Ali tomonidan ochilgan bo‘lsa, 23-daqiqada Rodrigo Mora tablodagi natijani tenglashtirdi. Birinchi bo‘lim yakunida Abu Ali yana gol kiritib, dubl qayd etdi va jamoasini hisobda oldinga olib chiqdi.
Ikkinchi taymda ham gollar “otishmasi” davom etdi. 50-daqiqada Villiam Gomes hisobni 2:2 ko‘rinishiga keltirdi. Ammo oradan bir daqiqa o‘tib, Abu Ali het-trikni rasmiylashtirib, “Al-Ahli”ni yana oldinga olib chiqdi. 53-daqiqada “Portu” yana hisobni tenglashtirdi.
64-daqiqada Ben Romdhane “Al-Ahli”ning to‘rtinchi goliga mualliflik qildi. O‘yin yakuniga yaqin “Portu” javob golini urib, hisobni 4:4 ko‘rinishiga keltirdi. Uchrashuv shu natija bilan nihoyasiga yetdi.
Ushbu bellashuvlardan keyin A guruhida “Inter Mayami” va “Palmeyras” hisobidagi ochkolar soni 5 taga yetdi va har ikki jamoa ham keyingi bosqichga yo‘l oldi. 2 ochkoga ega “Portu” hamda “Al-Ahli” musobaqa bilan xayrlashadigan bo‘ldi.
Klublar o‘rtasidagi Jahon chempionati — 3-tur
24-iyun, seshanba
“Inter Mayami” — “Palmeyras” 2:2
Gollar: 1:0 — Allende (16), 2:0 — Suares (65), 2:1 — Paulinyo (80), 2:2 — Mauriso (87).
“Portu” — “Al-Ahli” 4:4
Gollar: 0:1 — Ali (15), 1:1 — Mora (23), 1:2 — Ali (45+2), 2:2 — Gomes (50), 2:3 — Ali (51), 3:3 — Samu (53), 3:4 — Romdhane (64), 4:4 — Pepe (89).
Izoh (0)