Kataloniyaning “Barselona” klubi sobiq bosh murabbiyi Xavi Ernandes Saudiya Arabistonida faoliyatini davom ettirishi mumkin. Bu haqda Foot Mercato nashri xabar berdi.
Manbaga ko‘ra, 45 yoshli ispaniyalik mutaxassis “Al-Ahli” klubidan rasmiy taklif olgan. Hozirda jamoani Mattias Yayssle boshqarmoqda, ammo Jidda klubi rahbariyati mavsum yakunlangach, klubga boshqa murabbiy olib kelish haqida o‘ylamoqda.
Garchi ular Osiyo Chempionlar Ligasining amaldagi g‘olibi hisoblansa-da, “Al-Ahli” Saudiya chempionatida beshinchi o‘rinda bormoqda. Bu esa rahbariyatni qanoatlantirmayapti. Shu bois jiddaliklar 37 yoshli nemis mutaxassisiga chiqish eshigini ko‘rsatishi mumkin.
Xavi “Barselona”da 2021-yil noyabrdan 2024-yil iyunga qadar bosh murabbiy bo‘lib ishlagan edi. U shundan beri hech qaysi jamoada ish boshlagani yo‘q. Mutaxassis uchun Osiyo qit’asi begona emas. Sababi Xavi 2019-yildan 2021-yilgacha Qatarning “As-Sadd” klubida faoliyat yuritgan edi.
Izoh (0)