O‘zbekiston 23–25-iyun kunlari ilk bor BMTning Davlat xizmati forumi — UNPSF 2025 ga mezbonlik qilmoqda, deb xabar berdi Raqamli texnologiyalar vazirligi.
Samarqandda o‘tkazilayotgan forumda dunyoning turli mintaqalaridan yuqori martabali mehmonlar, davlat xizmatlari vakillari va innovatsion yetakchilar ishtirok etmoqda. Tadbirning ochilish marosimida ishtirokchilarga Shavkat Mirziyoyevning tabrigi o‘qib eshittirildi.
“Avvalambor, sizlarni Markaziy Osiyo mintaqasida ilk bor o‘tkazilayotgan Birlashgan Millatlar Tashkilotining Davlat xizmati bo‘yicha Forumining ochilishi bilan chin qalbimdan samimiy muborakbod etaman.Forumni dunyo sivilizatsiyalari chorrahasida joylashgan Samarqand shahrida o‘tkazish borasidagi tashabbusimizni qo‘llab-quvvatlagani uchun Birlashgan Millatlar Tashkiloti Bosh kotibi Antoniu Gutterish janobi oliylariga alohida minnatdorlik bildirmoqchiman. Fursatdan foydalanib, BMT tashabbusi bilan dunyoda keng nishonlanib kelayotgan 23-iyun – Davlat xizmati kuni bilan barchangizni qizg‘in tabriklayman”, deyiladi tabrikda.
Prezident tabrigida qayd etilishicha, O‘zbekistonda xotin-qizlarning davlat boshqaruvidagi ulushi 35 foizga yetib, mamlakat bu borada mintaqada yetakchi o‘rinni egalladi. 700 dan ziyod davlat xizmatlari “yagona darcha” tamoyili asosida onlayn platformalar orqali amalga oshirilmoqda.
Davlat xizmati va boshqaruvi jarayonlarini to‘liq raqamlashtirish natijasida O‘zbekiston BMTning elektron hukumatlar rivojlanish darajasi bo‘yicha global reytingida 24 pog‘onaga, Sun’iy intellektga tayyorlik bo‘yicha xalqaro indeksda so‘nggi bir yil ichida 17 pog‘onaga ko‘tarildi.
“Institutsional salohiyatni oshirish va inson kapitaliga sarmoya kiritishga ko‘maklashish uchun xalqaro tajriba asosida endaument imkoniyatlaridan foydalanish yo‘lga qo‘yilmoqda. Shu bois, sizlarni O‘zbekistonda davlat xizmatida raqamli transformatsiya bo‘yicha Global bilim markazini ochish, xalqaro Yosh yetakchilar maktabini tashkil etish kabi global tashabbuslarimizni qo‘llab-quvvatlashga chaqiramiz”, deyiladi davlat rahbari tabrigida.
Raqamli hukumat loyihalarini boshqarish markazining bildirishicha, ushbu forum 2030-yilgacha bo‘lgan kun tartibi hamda Barqaror rivojlanish maqsadlariga (BRM) erishishda davlat sektori imkoniyatlarini kengaytirish, uning inson kapitali va texnologik salohiyatini mustahkamlashga qaratilgan.
Izoh (0)