Toshkent davlat yuridik universiteti “THE Impact Ranking — 2025” xalqaro reytingida 100 pog‘ona yuqorilab, dunyo bo‘yicha 301-o‘rinni egalladi

Turkiyaning Istanbul shahrida bo‘lib o‘tayotgan nufuzli “Global Sustainable Development Congress — 2025” xalqaro kongressida mamlakatimizning 9 ta oliygohi, shu jumladan, Toshkent davlat yuridik universiteti ham O‘zbekiston oliy ta’lim tizimi nomidan ishtirok etmoqda. Dunyoning ilg‘or universitetlari, xalqaro tashkilotlari va yetakchi ekspertlarini jamlagan xalqaro anjumanda ta’lim, ilm-fan va boshqaruv sohalarida Barqaror rivojlanish maqsadlari (SDG) doirasidagi strategiyalar muhokama qilinmoqda.

Kongressdagi eng muhim va asosiy voqealardan biri, shubhasiz, “Times Higher Education Impact Rankings — 2025” xalqaro reytingining natijalari e’lon qilinishi bo‘ldi.

Universitetlarning BMT Barqaror rivojlanish maqsadlariga erishishga qo‘shgan hissasini baholovchi mazkur xalqaro reytingda joriy yilda dunyoning 2500 ta oliy ta’lim muassasasi ishtirok etdi. Quvonarlisi, mazkur reytingda Toshkent davlat yuridik universiteti 2024-yilga nisbatan 100 pog‘ona yuqorilab, 301-o‘rinni egalladi. Bu hali hammasi emas, albatta. Universitet SDG 5 — Gender tengligi tamoyili bo‘yicha 51-o‘rinni egallab, TOP-100 universitet orasidan joy oldi.

Shunindek, TDYU mazkur xalqaro reytingda SDG 4 — Ta’lim sifati bo‘yicha — 301-o‘rinni, SDG 8 — Munosib ish o‘rin va iqtisodiy o‘sish bo‘yicha 101-o‘rinni, SDG 16 — Tinchlik, adolat va kuchli institutlar va SDG 17 — Maqsadlar bo‘yicha hamkorlik yo‘nalishlarida 201-o‘rinni egalladi.

— Times Higher Education tomonidan e’lon qilingan xalqaro reytinglarda universitetimizning yuksalishi bu yurtimizda yuridik ta’lim va fanni rivojlantirishga qaratilgan e’tibor mahsulidir. Bu natija faqat raqamlar emas, bu bizning xalqaro maydondagi o‘rnimiz, ta’lim va ilmiy yondashuvlarimizga berilgan yuksak bahodir. Ayniqsa, gender tengligi bo‘yicha 51-o‘rinni egallaganimiz bizning jamiyatda adolat va tenglikka asoslangan yondashuvimiz samarasidir. Bunday yutuqlar ortida fidokor jamoamiz, ochiq boshqaruv va talabalarimizning yuksak intilishi turibdi. Toshkent davlat yuridik universiteti endi nafaqat milliy, balki global ta’lim maydonining faol ishtirokchisidir, deydi Toshkent davlat yuridik universiteti rektori v.b., yuridik fanlar doktori, professor Islambek Rustambekov.

Toshkent davlat yuridik universiteti birgina shu yutuq bilan cheklanib qolmagan, albatta. Universitet “Times Higher Education World University Rankings — 2024”, “Asia University Rankings — 2024”, THE “Young University Rankings” xalqaro reytinglarida O‘zbekistondan birinchilardan bo‘lib “Reporter” sifatida e’tirof etilib, “World’s Universities with Real Impact” xalqaro reytingida 183-o‘rinni, “Round University Ranking — 2025”da 918-o‘rinni egalladi. TDYU “Round University Ranking — 2025”da ta’lim sifati bo‘yicha “Bronza universitetlar ligasi” ro‘yxatiga kiritilib, TOP-500, “Round University Ranking World — 2024”, “RUR Academik Ranking” va  “RUR Reputation Ranking” bo‘yicha TOP-1000 universitet orasidan joy oldi.

Shuningdek, TDYU “HE Higher Education Ranking — 2025” xalqaro reytingining TOP—5 universiteti orasida e’tirof etildi.

Bundan tashqari, universitet AD Scientific Index (Alper-Doger Scientific Index) reytingiga ko‘ra, O‘zbekiston oliy o‘quv yurtlari orasida “LAW subject” yo‘nalishi bo‘yicha 1-o‘rinni egalladi. 

Mazkur natijalar O‘zbekiston oliy ta’limi tizimining global maydondagi kuchli va faol pozitsiyasini mustahkamlab borayotgani hamda raqobatbardoshligi ortayotganidan darakdir.