2025-yilgi “Rolan Garros” finali tennis muxlislariga unutilmas qarama-qarshilikni tuhfa etdi. Dunyoning birinchi va ikkinchi raqamli tennischilari — Yannik Sinner va Karlos Alkaras o‘rtasidagi bahs haqiqiy tennis dramasi sifatida tarixga kirdi.
Uchrashuv 5 soat 32 daqiqa davom etdi va Fransiya ochiq chempionati tarixidagi eng uzoq final sifatida rekord o‘rnatdi. Yakunda esa g‘alaba ispaniyalik Karlos Alkarasga nasib etdi.
Sinner kuchliroq boshladi
O‘yinni faolroq boshlagan Yannik Sinner birinchi setda raqibining to‘rt breyk-poyntini qaytarib, setni 6:4 hisobida o‘z foydasiga hal qildi. Ikkinchi setda ham Sinner ustunlik qildi. Biroq bu safar Alkaras kuchliroq qarshilik ko‘rsatdi. Yannik garchi set davomida 5:3 hisobida oldinda borayotgan bo‘lsa-da, g‘olib nomi tay-breykda aniqlandi. Unda italiyalik tennischi 7:6 hisobida g‘alaba qozondi.
Alkarasning qaytishi
Uchinchi setda tashabbusni Alkaras qo‘lga oldi. U 5:2 hisobida oldinga chiqib olganiga qaramay, Sinner farqni qisqartirdi. Biroq ispan tennischisi vaziyatni qo‘ldan chiqarmay, setni 6:4 hisobida g‘alaba qozondi va o‘yinga intriga qaytdi.
To‘rtinchi set ham murosasiz kechdi va tay-breykkacha cho‘zildi. Bu safar ruhiy ustunlik Alkaras tomonida edi. Ayniqsa, Sinner 5:4 hisobida oldinda bo‘lgan va uch bor g‘alabaga yaqinlashgan pallalarda Alkaras bosim ostida vaziyatni saqlab qoldi va setni 7:6 (7:3) hisobida o‘z foydasiga hal qildi.
Shu tariqa har ikki tennischi ikkita setdan yutib, bahsni hal qiluvchi — beshinchi setga olib borid.
Final nuqtasi – tay-breykdagi ustunlik
So‘nggi setda har ikki tomon ehtiyotkorlik bilan harakat qildi. Biror marta ham breyk nuqtasi kuzatilmadi va g‘olib yana tay-breykda aniqlandi. Unda esa Alkaras to‘liq ustunlik qildi. U 7:0 hisobida oldinga o‘tib, tay-brekni 10:2 hisobida yakunladi va chempionlikni qo‘lga kiritdi.
Tarixiy natija
4:6, 6:7 (4:7), 6:4, 7:6 (7:3), 7:6 (10:2) — Karlos Alkarasning finaldagi g‘alabasi tarixga kirdi.
Bu ispan tennischisining “Rolan Garros”dagi ikkinchi, umumiy hisobda esa “Katta Dubulg‘a” turnirlaridagi beshinchi chempionligi bo‘ldi.
Izoh (0)