Qurilish va uy-joy kommunal xo‘jaligi sohasida nazorat qilish inspeksiyasi mustaqil respublika ijro etuvchi hokimiyat organi sifatida shakllantiriladi. Bu haqda “Qurilish va uy-joy kommunal xo‘jaligi sohasida davlat nazoratini samarali tashkil qilish chora-tadbirlari to‘g‘risida”gi prezident farmonida belgilandi.
Inspeksiyaga xo‘jalik yurituvchi subyektlarning moliyalashtirish manbalaridan qat’i nazar, moliya-xo‘jalik faoliyatiga aralashish qat’iyan taqiqlanadi.
Farmonga ko‘ra, qurilish, ko‘p kvartirali uylarni boshqarish hamda ichimlik suvi ta’minoti va oqova suvlarni chiqarib yuborish sohasida nazorat funksiyalari to‘liq raqamlashtiriladi. Xususiy sektor tomonidan amalga oshiriladigan nazorat tizimi mexanizmlari shakllantiriladi.
Bular qurilish va uy-joy kommunal xo‘jaligi sohasida davlat nazoratini takomillashtirishning asosiy maqsadlari etib belgilandi.
2025-yil 1-maydan tadbirkor va qurilish va uy-joy kommunal xo‘jaligi sohasida nazorat qilish hududiy inspeksiyalari o‘rtasida shartnoma tuzilgan bo‘lsa, tadbirkorlarning qurilish obyektlarida qisqa muddatli davlat qurilish nazorati tadbirlari shartnoma shartlari doirasida amalga oshiriladi va “Yagona davlat nazorati” axborot tizimida ro‘yxatdan o‘tkazilmaydi.
Farmonga ko‘ra, 2025 yil 1-sentyabrdan har bir qurilayotgan obyektning QR-kodli pasporti joriy qilinadi. Bu orqali shaharsozlik subyektlari, tasdiqlangan ekspertiza xulosalari haqidagi ma’lumotlarni olish imkoniyati yaratiladi.
Har bir qurilayotgan obyektning ko‘rinish joyiga buyurtmachi yoki quruvchi tomonidan QR-kod ilib qo‘yiladi.
Ushbu QR-kodga telefonni yo‘naltirib, quyidagi ma’lumotlarga ega bo‘lish mumkin:
- obyektning turiga ko‘ra qanday obyekt qurilayotgani;
- buyurtmachi, loyihachi va quruvchi tashkilotlar nomlari;
- quruvchining reytingi;
- loyihaga tegishli shaharsozlik hujjatlari.
Obyektning foydalanishga topshirish muddatlari bilan tanishish imkoniyati ham bo‘ladi.
Farmonga ko‘ra, ko‘p kvartirali uylardagi joylarni, shuningdek, yerto‘lalarni qayta qurish va qayta rejalashtirishda shaharsozlik normalarini buzgan holda ko‘p kvartirali uyning konstruktiv qismlari va tayanch devorlariga o‘zgartirish kiritish, buzish hamda binoning zilzilaga bardoshliligiga salbiy ta’sir qiladigan ishlarni amalga oshirish taqiqlanadi.
O‘zbekistonda 3-mart kuni imzolangan qonun bilan qurilish maydonlarida atmosfera havosini muhofaza qilish talablariga rioya etmaganlik uchun javobgarlik belgilandi.
Izoh (0)