Toshkent viloyatining Yangiyo‘l shahrida qurilish kranining o‘q qismi bog‘cha tomiga quladi.
Qurilish va uy-joy kommunal xo‘jaligi vazirligi matbuot xizmatining ma’lum qilishicha, 25-mart kuni soat 19:10 lar atrofida “Baxt” MFYda joylashgan 5-sonli bog‘cha bilan qo‘shni hududda xususiy tadbirkor tomonidan qurilayotgan turar joy kompleksida o‘rnatilgan ko‘tarma kranning o‘q (strela) qismi yomg‘ir sababli qulagan. Oqibatda bog‘cha tom qismiga shikast yetgan.
-X9Imv4Zb.avif)
Hodisa joyiga zudlik bilan Favqulodda vaziyatlar bo‘limi, hokimiyat, prokuratura, IIB mutasaddilari yetib borgan. Binoning tom qismini zararlagan ko‘tarma kran o‘qi olib tashlanib, vaziyat to‘liq nazoratga olingan.
Ayni kunlarda qurilish tashkiloti tomonidan muassasa tom qismida zarar yetgan profnastil qoplama va yog‘och qism olib tashlanib, ta’mirlash ishlari boshlangan. Qurilish tashkiloti mas’ullari 3 kun muddatda bog‘chaning zarar yetgan qismini ta’mirlab, binoni ishchi holatga keltirishini bildirdi.
Toshkent viloyati maktabgacha va maktab ta’limi boshqarmasi matbuot xizmatining ma’lum qilishicha, baxtsiz hodisa oqibatida jarohat olganlar yo‘q. Hozirda bog‘cha faoliyati bir muddatga to‘xtatilgan.
8-mart kuni Toshkent viloyatining Yangiyo‘l tumanidagi asosiy qatnov yo‘ldagi ko‘prikning beton tutqichi qulab tushib, xavfli vaziyat yuzaga kelgandi.
Izoh (0)