Қурилиш ва уй-жой коммунал хўжалиги соҳасида назорат қилиш инспекцияси мустақил республика ижро этувчи ҳокимият органи сифатида шакллантирилади. Бу ҳақда “Қурилиш ва уй-жой коммунал хўжалиги соҳасида давлат назоратини самарали ташкил қилиш чора-тадбирлари тўғрисида”ги президент фармонида белгиланди.
Инспекцияга хўжалик юритувчи субъектларнинг молиялаштириш манбаларидан қатъи назар, молия-хўжалик фаолиятига аралашиш қатъиян тақиқланади.
Фармонга кўра, қурилиш, кўп квартирали уйларни бошқариш ҳамда ичимлик суви таъминоти ва оқова сувларни чиқариб юбориш соҳасида назорат функциялари тўлиқ рақамлаштирилади. Хусусий сектор томонидан амалга ошириладиган назорат тизими механизмлари шакллантирилади.
Булар қурилиш ва уй-жой коммунал хўжалиги соҳасида давлат назоратини такомиллаштиришнинг асосий мақсадлари этиб белгиланди.
2025 йил 1 майдан тадбиркор ва қурилиш ва уй-жой коммунал хўжалиги соҳасида назорат қилиш ҳудудий инспекциялари ўртасида шартнома тузилган бўлса, тадбиркорларнинг қурилиш объектларида қисқа муддатли давлат қурилиш назорати тадбирлари шартнома шартлари доирасида амалга оширилади ва “Ягона давлат назорати” ахборот тизимида рўйхатдан ўтказилмайди.
Фармонга кўра, 2025 йил 1 сентябрдан ҳар бир қурилаётган объектнинг QR-кодли паспорти жорий қилинади. Бу орқали шаҳарсозлик субъектлари, тасдиқланган экспертиза хулосалари ҳақидаги маълумотларни олиш имконияти яратилади.
Ҳар бир қурилаётган объектнинг кўриниш жойига буюртмачи ёки қурувчи томонидан QR-код илиб қўйилади.
Ушбу QR-кодга телефонни йўналтириб, қуйидаги маълумотларга эга бўлиш мумкин:
- объектнинг турига кўра қандай объект қурилаётгани;
- буюртмачи, лойиҳачи ва қурувчи ташкилотлар номлари;
- қурувчининг рейтинги;
- лойиҳага тегишли шаҳарсозлик ҳужжатлари.
Объектнинг фойдаланишга топшириш муддатлари билан танишиш имконияти ҳам бўлади.
Фармонга кўра, кўп квартирали уйлардаги жойларни, шунингдек, ертўлаларни қайта қуриш ва қайта режалаштиришда шаҳарсозлик нормаларини бузган ҳолда кўп квартирали уйнинг конструктив қисмлари ва таянч деворларига ўзгартириш киритиш, бузиш ҳамда бинонинг зилзилага бардошлилигига салбий таъсир қиладиган ишларни амалга ошириш тақиқланади.
Ўзбекистонда 3 март куни имзоланган қонун билан қурилиш майдонларида атмосфера ҳавосини муҳофаза қилиш талабларига риоя этмаганлик учун жавобгарлик белгиланди.
Изоҳ (0)