Toshkent viloyati Toshkent tumanida me’yoriy talablarga javob bermaydigan yana bir obyektning qurilishi to‘xtatildi, deb xabar bermoqda Qurilish va uy-joy kommunal xo‘jaligi vazirligi.
Vazirlik huzuridagi nazorat inspeksiyasi KHAY yo‘lida qurilayotgan 9 qavatli uyda nazorat tadbiri o‘tkazganda obyekt loyihasiga o‘zgartirishlar kiritilgani, xususan, ichki g‘isht terish jarayonlarida loyiha talablariga amal qilinmagani, ayrim joylarda gazoblok o‘rniga g‘isht ishlatilgani ma’lum bo‘lgan. Ta’kidlanishicha, bu binoning mustahkamligiga jiddiy xavf tug‘dirib, ortiqcha yuklama yuklaydi.
Inspeksiya mutaxassisi Hikmatilla Sa’dullayevning so‘zlariga ko‘ra, bu bino uchun kelgusida zilzilaviy holatlarda salbiy ta’sir ko‘rsatishi ma’lum bo‘ldi. Bundan tashqari, binoga noqonuniy tarzda qo‘shimcha qavat qo‘shilgan. Ya’ni hujjatda qurilish obyekti 9 qavatli deb ko‘rsatilgan bo‘lsa-da, amalda unda 10-qavat kolonnalari qurilgani aniqlangan. Loyihaga zid ravishda bajarilib, noqonuniy qo‘shilgan qavatlarni demontaj qilish ishlari boshlangan.
Xabarda aytilishicha, mazkur holatlar yuzasidan inspeksiya xodimlari tomonidan obyektdagi barcha qurilish ishlari joyida to‘xtatilgan. Loyiha talablariga zid ravishda barajarilgan ishlarning barchasini buzdirish bo‘yicha yozma ko‘rsatma berildi va buzdirish jarayon boshlandi.
O‘zbekistonda 2024-yilda 233,8 trillion so‘mlik qurilish ishlari bajarilgan. 2025-yilda 120 ming xonadonli ko‘p qavatli uylar qurilishi kutilmoqda.
Izoh (0)