Hindiston hukumati musulmonlarga tegishli vaqf yerlarini boshqarish tartibini o‘zgartirmoqchi. Bu boradagi qonun loyihasi parlamentga taqdim etildi va jamoatchilik orasida bahs-munozaralarga sabab bo‘ldi. Bu haqda Reuters xabar berdi.

Vaqf mulklari musulmonlar tomonidan diniy, ma’rifiy yoki xayriya maqsadlarida foydalaniladi. Bunday yer va binolarni sotish yoki boshqalarga berish taqiqlangan. Hukumat ma’lumotlariga ko‘ra, Hindistondagi 25 dan ortiq vaqf kengashlari 85 1535 ta mulk va 900 ming akr yerni boshqaradi. Bu ko‘rsatkichlar ularni mamlakatning eng yirik yer egalari qatoriga kiritadi.
Bosh vazir Narendra Modi hukumati tomonidan taqdim etilgan Vaqf to‘g‘risidagi qonun loyihasi markaziy Vaqf kengashiga musulmon bo‘lmagan a’zolarni kiritishni taklif qiladi. Shuningdek, hukumat nizoli vaqf mulklariga egalik huquqini aniqlash vakolatiga ega bo‘ladi.
Qonun loyihasi musulmon jamoasi va Modi hukumati o‘rtasidagi ziddiyatlar ortib borayotgan bir paytda kiritildi. Musulmonlar hujjatni o‘z mulklariga bo‘lgan huquqlarini zaiflashtirish va ularni himoya qilish imkoniyatlarini cheklashga qaratilgan harakat deb baholamoqda.
Ozchiliklar ishlari bo‘yicha vazir Kiren Rijiju bu islohot korrupsiya va noto‘g‘ri boshqaruvga chek qo‘yishini, shuningdek, ayrim musulmon oilalari va elita guruhlari nazoratidagi mulkchilik qoidalarini qayta ko‘rib chiqish imkonini berishini aytdi.
Loyihaga ko‘ra, Vaqf kengashida musulmon bo‘lmaganlarga ikkita lavozim ajratilishi mumkin. Biroq bu musulmonlarga ham hind ibodatxonalari kengashlarida shunday imkoniyat yaratilishini anglatadimi? Modi hukumati Islom yer fondini nazorat qilishni istamoqda, ammo ularning muassasalarimizga aralashishga haqqi yo‘q, deydi Butun Hindiston musulmonlari shaxsiy huquq kengashi vakili Kamal Farouqi.
Pew Research Center prognozlariga ko‘ra, 2050-yilga kelib Hindiston dunyodagi eng ko‘p musulmon aholiga ega mamlakatga aylanadi. Shunga qaramay, mamlakat aholisining taxminan 13 foizini tashkil etuvchi musulmon jamoasi ta’lim, bandlik va siyosiy vakillik bo‘yicha milliy o‘rtacha darajadan orqada qolmoqda.
Musulmon tashkilotlari Modi boshchiligidagi hukmron partiya va hind millatchi guruhlarini 2014-yildan buyon islomga qarshi siyosat yuritishda, zo‘ravonlikni rag‘batlantirishda va musulmonlarga tegishli mulklarni buzishda ayblamoqda. Biroq Modi va uning partiyasi bu ayblovlarni rad etmoqda.
Izoh (0)