Vayner Muborak Abdullayeva “O‘zimizning gap” ko‘rsatuviga bergan intervyusida Instagram sahifasidan qancha pul topishi va birinchi daromadini nimaga sarflagani haqida so‘zlab berdi.
“Vaynchilarning asosiy daromadi — reklamadan. Lekin blogerlar ham reklama qiladigan va qilmaydigan narsalar bor. Masalan, menga chiqqan reklamalarning hammasini ham olavermayman. Kimgadir foydasi tegsagina reklama qilaman. Befoyda narsani reklama qilib, kuzatuvchilarimga zarar yetkazishni xohlamayman. Sahifamdagi Stories’ga reklama joylash — 5 million so‘m. Lentada bir oy reklama turishi — 20 million so‘m. Bu pulning hammasi o‘zimga emas. Biron mahsulotni chiroyli qilib reklama qilib berish uchun yaxshi g‘oya, sifatli video tayyorlash kerak. Shunday vaziyatlar bo‘ladiki, yaqinlarim iltimos bilan chiqqanida bepul reklama joylashim ham mumkin”, — deydi vayner.
“Birinchi marta “Afandining qizlari” jamoasi bilan reklamadan daromad ko‘rganmiz. O‘shanda topgan pulimni oilaviy qarzimizni to‘lashga ishlatganman. Ota-onam ozgina qarz bo‘lib qolishgan edi. O‘zimga narsa olsam unchalik rohatlanmayman. Lekin buvim, ota-onamga nimadir olib bersam, judayam ko‘p duo qilishadi. Shu paytda juda ham xursand bo‘lib ketaman”, — deydi Muborak Abdullayeva.
Aktrisa, shuningdek, qanday insonga turmushga chiqishni orzu qilishi haqida ham so‘zlab berdi.
“25 yoshga chiqdim. Hozirda o‘zimga shaxsiy hayotga ruxsat bermadim. Hayotimda hech kim yo‘q va shu paytgacha hech kim bo‘lmagan. Men doim uyimdagilarga aytaman: “50 yil birga yashab, kimdir mendan hayotingiz orqaga qaytganida yana shu insonga turmushga chiqarmidingiz, deb so‘rashsa, hech ikkilanmay, albatta, deb javob beradigan insonni uchratganimda oila quraman”, deyman.
Izoh (0)