O‘zbekistonda 28-dekabr kuni “Telekommunikatsiyalar to‘g‘risida”gi qonun qabul qilindi.
Ushbu qonun Qonunchilik palatasi tomonidan 6-avgustda qabul qilinib, Senat tomonidan 23-oktyabrda ma’qullangandi. Qonun telekommunikatsiyalar sohasidagi munosabatlarni tartibga soladi.
Qonun bilan telekommunikatsiya bozori rivojlangan xorijiy davlatlarning tajribasi va amaliyoti chuqur tahlil qilindi. Qonunda telekommunikatsiya bozorini tartibga soluvchi regulyator va ushbu bozorni rivojlantirish siyosatini olib boruvchi davlat organlarining vazifalari aniq belgilab qo‘yildi.
Tartibga soluvchi organga telekommunikatsiyalar sohasidagi faoliyatni litsenziyalash, ruxsat berish tartib-taomillarini amalga oshirish, tabiiy va texnogen xususiyatli favqulodda vaziyatlarda yoki favqulodda holatlarda telekommunikatsiya infratuzilmalaridan ustuvor foydalanish hamda ularning faoliyatini tiklash va rivojlantirish, operatorlar va provayderlarning faoliyat ko‘rsatishi uchun teng hamda adolatli raqobat muhitini taʼminlash vakolatlari berildi.
Raqamli texnologiyalar vazirligi telekommunikatsiyalar sohasidagi vakolatli davlat organidir. Axborotlashtirish va telekommunikatsiyalar sohasida nazorat bo‘yicha inspeksiya telekommunikatsiyalar sohasida davlat nazoratini amalga oshiruvchi organdir.
Umumiy foydalanishdagi telekommunikatsiyalar tarmoqlarining operatorlari va provayderlari barcha foydalanuvchilarga belgilangan sifatga ega universal xizmatlarni lisenziya doirasida cheklanmagan tarzda ko‘rsatadi.
O‘zbekistonda telekommunikatsiyalar tarmoqlari ommaviy yoki xususiy mulkda bo‘lishi mumkin. Telekommunikatsiyalar tarmoqlarining barcha mulkdorlari teng huquqlarga ega bo‘ladi va qonunda kafolatlangan teng himoyadan foydalanadi.
Qonun rasmiy e’lon qilingan kundan e’tiboran kuchga kirdi.
Izoh (0)