Endilikda bank va to‘lov tizimi orqali xizmatlarni ko‘rsatishda telekommunikatsiyalar sohasida faoliyat yuritish uchun litsenziya talab etilmasligi mumkin. Bu haqda 11-mart kuni bo‘lib o‘tgan Senatning Axborot siyosati va davlat organlarida ochiqlikni taʼminlash masalalari qo‘mitasi majlisida taʼkidlangan.
Maʼlum qilinishicha, majlisda “Telekommunkatsiyalar to‘g‘risida”gi qonun dastlabki tarzda muhokama qilingan.
Taʼkidlanganidek, bugungi kunga qadar yangi qurilgan ko‘p qavatli uylarning ayrimlarida tegishli infratuzilma ko‘zda tutilmagani sababli qayta qurilish ishlarini olib borishga to‘g‘ri kelayotgan edi. Shunday ovoragarchiliklarning oldini olish maqsadida bundan keyin bino va inshootlar qurilishida telekommunikatsiya infratuzilmasi majburiy bo‘ladi.
Jumladan, ko‘p qavatli uylarda yashovchilarning arizasi bo‘lganda xizmat ko‘rsatuvchi tadbirkorlik subyektlariga binoda mavjud infratuzilmadan beg‘araz foydalanish imkoniyati yaratiladi. Operatorlarga telekommunikatsiya infratuzilmasi obyektlaridan birgalikda foydalanishga ruxsat beriladi.
Ushbu holatlarga ahamiyat berilmasa internet termoqlari yoki shu kabi telekommunikatsiya tarmoqlarining montaj jarayonlari yagona standartlar asosida amalga oshirilmay, turli muammolarni keltirib chiqarishi mumkin.
Shuningdek, qonun bilan telekommunikatsiya sohasida faoliyat yurituvchi subyektlarga bir qator qulayliklar yaratilmoqda. Yaʼni qonun normalariga ko‘ra endilikda bank, to‘lov tizimi, to‘lov tashkiloti, elektron tijorat platformasi ilovalari orqali xizmatlarni ko‘rsatishda telekommunikatsiyalar sohasida faoliyat yuritish uchun litsenziya talab etilmaydi.
Bundan tashqari, qonun normalari konstitutsiyaga moslashtirilmoqda, xususan, qonun 7-moddasiga muvofiq telekommunikatsiyalar sohasidagi davlat siyosatining asosiy yo‘nalishlaridan biri sifatida internet jahon axborot tarmog‘idan foydalanishni taʼminlash uchun shart-sharoitlar yaratish ekanligi belgilab qo‘yilmoqda.
Majlis so‘ngida ko‘rilgan masala yuzasidan qo‘mitaning tegishli qarori qabul qilindi.
Izoh (0)