O‘zbekiston aholisi yanada sifatli telekommunikatsiya xizmatlari bilan ta’minlanishiga xizmat qiluvchi qonun qabul qilindi

Senatning qirq ikkinchi yalpi majlisida “Radiochastota spektri to‘g‘risida”gi qonun ma’qullandi, deb xabar bermoqda yuqori palata matbuot xizmati.

Majlisda qayd etilishicha, radiochastota spektridan foydalanuvchilarning o‘z radiochastota spektridan foydalanish huquqini boshqa shaxsga berishiga nisbatan mavjud taqiq radiochastota spektridan yanada samarali foydalanish imkoniyatlarini cheklamoqda. Bu esa o‘z navbatida telekommunikatsiyalar tarmoqlarining rivojlanishiga to‘siq bo‘lmoqda. Bundan tashqari, axborot xavfsizligi ta’minlanishini yanada kuchaytirish maqsadida, shuningdek, amalga oshirilayotgan ma’muriy islohotlarni inobatga olib mazkur qonunga tegishli o‘zgartishlar kiritish zaruriyati yuzaga kelmoqda.

Shu munosabat bilan ushbu qonun bilan radiochastota spektridan foydalanuvchilarga o‘zlariga biriktirilgan radiochastota spektridan boshqa foydalanuvchilar bilan birgalikda foydalanish huquqi berilishini va undan foydalanish tartibi belgilanishini nazarda tutuvchi o‘zgartishlar kiritilmoqda.

Shuningdek, radioelektron vositalardan foydalanish jarayonini soddalashtirish maqsadida loyihalash bo‘yicha ruxsatnoma olish tartibi bekor qilinmoqda. Senatorlarning ta’kidlashicha, qonunga kiritilayotgan bu kabi o‘zgarishlar radiochastota spektri foydalanuvchilari faoliyatida juda muhim hisoblanib, aloqa xizmatlarining sifatini oshirish uchun muhim omildir.

Senatorlarning fikricha, ushbu qonunning qabul qilinishi radiochastota spektridan yanada samarali foydalanilishiga, telekommunikatsiya tarmoqlarining rivojlanishiga, shuningdek, aholining yanada sifatli telekommunikatsiya xizmatlari bilan ta’minlanishiga xizmat qiladi.