Xonanda va aktrisa Aziza Nizomova 21-oktyabr kuni 33 yoshni qarshiladi. Muxlislariga hamisha pozitiv kayfiyatda ko‘rinish beradigan ijodkor mashhur huquqshunoslar oilasida tug‘ilgani va otasi Adliya vaziri bo‘lganidan xabaringiz bormi? Xo‘sh, nega u sanʼat sohasini tanladi va qo‘shiqchilik faoliyatini aktrisalikka almashtirdi? Keling, bu kabi savollarga quyida javob izlaymiz.
“Otam adliya vaziri bo‘lgan”
Aziza Nizomova 1991-yilning 21-oktyabr sanasida Toshkent shahrida dunyoga kelgan. Otasi navoiylik huquqshunos Farhod Nizomov, onasi Gavhar Nizomova esa namanganlik bo‘lib, informatika o‘qituvchisi bo‘lib ishlagan. Oilada uch qiz tarbiyalangan, ularning kenjasi Aziza Nizomovadir. Ijodkorning Dono va Barno ismli ikki opasi bor. Ular ota kasbini tanlashgan.
— Ota-onam o‘zlari yurist bo‘lishiga qaramay meni doim qo‘llab-quvvatlashgan. Bizning uyimizda farzandlarga nisbatan hech qanday taqiqlar bo‘lmagan. Sanʼatga qiziqishim baland bo‘lgani uchun shu yo‘ldan ketganman.
Otam Farhod Nizomov juda ham yaxshi inson. O‘zbekistonda xizmat ko‘rsatgan yurist. O‘z vaqtida otam adliya vaziri bo‘lgan. Juda ham ko‘p kitob o‘qiganlar. Uyimizda haligacha katta kutubxona bor, deydi Aziza Nizomova.
“Semizligimdan uyalganman”
Aziza Nizomova bolalikdan sanʼatga kirib kelgani va Asal Shodiyeva bilan duet kuylagan vaqtlari uni haqorat qilganlardan ranjigani haqida gapirdi.
— Muyassar opa otamning singlisi. Juda ham yaxshi ayol. Yoshligimdan uyimizga kelib, menga fortepiano chalishni o‘rgatardilar. Sanʼatga bolalikdan kirib kelganman, baʼzan “Shahzoda, Rayhon bilan konsertlarda birga sahnaga chiqqanmiz”, desam hayron bo‘lishadi. U paytlari davlat tadbirlarida faol ishtirok etardik, “Toshkent” nomli qo‘shig‘imiz bor edi. O‘zi bolalar 12-13 yoshda g‘alati bo‘lib qolishadi, yaʼni tashqi ko‘rinishi katta odamga ham bolaga ham o‘xshamay qoladi. Men semizgina qiz bo‘lganman va tashqi ko‘rinishimdan uyalardim. Eng yomoni u paytda inson ancha taʼsirchan bo‘larkan, maktab partasiga tashqi ko‘rinishimni yomonlab, haqoratli so‘zlar yozib ketishardi. Bundan rosa yig‘lardim, deydi Aziza Nizomova.
“Yakkaxon xonanda bo‘lishga shoshilmaganman”
Aziza Nizomova nima uchun yakkaxon ijrochi bo‘lishga intilmagani va uzoq yillar bek-vokalda oddiy xonanda bo‘lib ishlaganini quyidagicha izohlaydi.
— Yakkaxon ijrochi bo‘lish ancha masʼuliyatli. Men o‘zimga nisbatan talabchan bo‘lganim uchun yakkaxon ijod qilishga shoshilmaganman. Bek-vokalda ishlab esa tajriba orttirganman, bundan tashqari ovoz doimiy charxlanib turadi, deydi Aziza Nizomova.
“Turmush o‘rtog‘im biznes partnyorim”
Xonanda tadbirkor inson bilan oila qurgan, hozirda uning Miranda ismli qizalog‘i bor.
— Turmush o‘rtog‘im bilan to‘yda tanishganmiz. U do‘stining to‘yiga kelgan, men esa o‘sha restoranda qo‘shiq kuylayotgan edim. Tanishganimizdan 4-5 oy o‘tib turmush qurganmiz. U kishi mendan pasportda bir yosh katta, ammo aql jihatdan ancha yetuk. Bir gaplashgandayoq ko‘p kitob o‘qiydigan inson ekani seziladi.
Turmush o‘rtog‘im tadbirkorlik bilan shug‘ullanadi. Ayni damda ikkimiz biznes partnyorlarmiz desam ham bo‘ladi. Chunki tadbirkorlikda hech omadim kelmasdi, ko‘nglim bo‘shligi hamisha pand berardi. U inson esa hisob-kitobga usta, tadbirkorlikda ko‘p yo‘l-yo‘riq o‘rgatadi, deydi Aziza Nizomova.
“To‘yim bo‘lishini istamaganman”
Aziza Nizomova to‘y qilish niyati bo‘lgani va bu holat ko‘plab shov-shuvlarga sabab bo‘lgani haqida quyidagilarni maʼlum qildi.
— Sanʼatkorlar haqida hamisha shov-shuv bo‘ladi. Hammasiga eʼtibor berish va negativlar bilan hisoblashish shart emas. Har bir insonning o‘z prinsiplari va rejalari bor. Masalan, to‘yim bilan bog‘liq gap-so‘zlar rosa tarqagandi. “Ikkinchi xotin ekan, to‘ydan avval homilador bo‘libdi”, shunga o‘xshash gap so‘zlar qulog‘imga yetib kelgandi. Men 18 yoshimda turmushga chiqqanim yo‘q, turmush o‘rtog‘im ham yosh bola emasdi. Biz avvaliga katta to‘y qilishni istamadik, nikohdan o‘tib yashayverdik. Ammo turmush o‘rtog‘im kutilmaganda to‘y qilaylik deb qoldi, deydi Aziza Nizomova.
“Qo‘shiqchilikda tanaffusdaman”
Aziza Nizomova keyingi paytlarda qo‘shiqchilik sohasiga kamroq eʼtibor berib, asosan seriallarda suratga tushmoqda. Xonanda buning sababini quyidagicha izohlaydi.
— Xonandalik shunday kasbki, doim biroz tanaffus qilib turish kerak. Chunki haddan tashqari uzoq vaqt bir sohada ishlasangiz, ilhomingiz ketib qoladi. Hozir ko‘p tanishlarimda shunday holat kuzatilmoqda. Shuning uchun ham ijodkorlar o‘zi uchun tanaffus olib turishi kerak.
Seriallarga esa takliflar ko‘p, agar maʼqul kelsa, suratga tushaman. Chunki u ham ijod. Unda ham rol ijro etsam yayrayman, deydi Aziza Nizomova. Xonanda hozirgi kunda ikkinchi bor ona bo‘lish arafasida turibdi.
Izoh (0)