Taniqli xonanda va aktrisa Aziza Nizomova YashinTV YouTube kanaliga bergan intervyusida muxlislarini qiziqtirgan ko‘plab savollarga javob berdi. Quyida intervyudagi ayrim qiziqarli savol-javoblar keltiriladi.
— Yuristlar oilasidan chiqqan Aziza Nizomova nima uchun san’at yo‘lini tanladi?
— Ota-onam o‘zlari yurist bo‘lishiga qaramay meni doim qo‘llab-quvvatlagan. Bizning uyimizda farzandlarga nisbatan hech qanday taqiqlar bo‘lmagan. San’atga qiziqishim baland bo‘lgani uchun shu yo‘ldan ketganman.
— Turmush o‘rtog‘ingiz bilan qanday tanishgansiz?
— Turmush o‘rtog‘im bilan to‘yda tanishganmiz. Ular do‘stlarining to‘ylariga kelganlar. Men esa o‘sha restoranda qo‘shiq kuylayotgan edim. Tanishganimizdan 4-5 oy o‘tib turmush qurganmiz. Ular mendan passportda bir yosh katta bo‘lsalar ham, aql jihatdan ancha yetuklar. Ko‘p kitob o‘qiganlari bois ular bilan suhbatlashish juda maroqli.
— Onangiz haqida ko‘p gapirasiz-u, negadir otangiz haqida gapirmaysiz?
—Otam juda ham yaxshi inson. O‘zbekistonda xizmat ko‘rsatgan yurist. O‘z vaqtida otam adliya vaziri bo‘lganlar. Juda ham ko‘p kitob o‘qiganlar. Uyimizda haligacha katta kutubxona bor.
— Muyassar Razzoqova sizga kim bo‘ladi?
— Muyassar opa otamning singillari. Juda ham yaxshi ayol. Yoshligimdan uyimizga kelib, menga fortepiano chalishni o‘rgatardilar.
— Bir oylik daromadingiz va xarajatlaringiz?
— Bitta serialda bir kun ishlashim uchun 1 million so‘m so‘rayman. Instagram’dagi 1 daqiqalik Stories’im 600 AQSh dollar. Lekin kamdan-kam reklama olaman. Duch kelgan narsani kuzatuvchilarimga tavsiya qilavermayman. Ammo shuni aytishim mumkinki, xarajatim daromadimdan ko‘proq. Shu sabab so‘nggi paytlarda tejamkor bo‘lishni o‘rganyapman.
— Nima uchun oxirgi paytlarda kam kuylayapsiz?
— Xonandalik shunday kasbki, doim biroz tanaffus qilib turish kerak. Chunki haddan tashqari uzoq vaqt bir sohada ishlasangiz, ilhomingiz ketib qoladi. Hozir ko‘p tanishlarimda shunday holat kuzatilmoqda. Shuning uchun ham ijodkorlar o‘zi uchun tanaffus olib turishi kerak.
Izoh (0)