Natalya Klimova o‘zining qisqa muddatli kino faoliyati davomida atigi 10 ta filmda rol o‘ynagan. Uning “Qorqiz”, “Qor malikasi” va boshqa filmlardagi ajoyib rollari tomoshabinlar xotirasida abadiy saqlanib qoladi.
Ijodining boshlanishi
Natalya Klimova (qizlik familiyasi — Malkina) 1938-yilda tug‘ilgan. Maktabni tugatgach, qurilish institutiga o‘qishga kiradi. Biroq birinchi kursdan so‘ng u aktrisa bo‘lishni xohlayotganini tushunadi. U hujjatlarini MXAT maktab-studiyasiga topshirib, barcha imtihonlardan o‘tadi. 1963-yilda Natalya o‘qishni tugatadi — shu yili “Ibtido va intiho” filmida o‘zining birinchi va shu bilan birga asosiy rolini o‘ynaydi.
Otashin muhabbat
Bir muncha vaqt aktrisa “Zamondosh” teatrida ishlagan, ammo o‘zi hayotining o‘sha davrini eslashni yoqtirmaydi. Natalya Ivanovna shunday deydi: “Zamondosh” dahshatli joy edi — xuddi bo‘rixona, unda aktyorlar bir-birini g‘ajib tashlashardi. U yerda nafrat va hasad hukmronlik qilardi”. U yerda faqat Vladimir Zamanskiy bilan birga ishlash yoqardi xolos.
O‘sha vaqtlarda Vladimirning yashaydigan joyi yo‘q edi, shuning uchun u teatr omborxonasida tunab yuradi. Bir kuni Natalya Zamanskiy sovqotganini o‘ylab, unga qo‘lqop olib keladi, aktyor qizdan juda minnatdor edi, lekin evaziga hech narsa taklif qila olmaydi. Garchand Klimovaning e’tirof etishicha, ular bir ko‘rishdayoq sevib qolmagan bo‘lsalar-da, ularning ishqiy munosabatlari shu tariqa boshlanadi.
4-kursda aktrisa homilador bo‘lib qoladi, lekin abort qildiradi, keyinchalik bu ishidan juda afsuslanadi. Natalya Ivanovna: “Ahmoqlik qildim...” der, Zamanskiy esa ko‘zlari jiqqa yoshga to‘lgan holda: “Xudbinlik...” deydi.
1962-yilda yashash joyi bo‘lmasa-da, yoshlar turmush quradi. Aytgancha, aktrisaning eri undan 12 yosh katta, ammo yoshdagi bunday farq aktyorlarning shaxsiy baxtini qurishiga to‘sqinlik qilmaydi.
Natalya Klimovaning yulduzlik davri
Kinodagi debyutidan bir yil o‘tgach, Natalya “O‘rtoq Arseniy” filmida rol ijro etadi. 1965-yilda u “Muhandis Garinning giperboloidi” filmida Zoya Monroz obrazini yaratadi, biroq bu rol na tomoshabinlar, na tanqidchilar tomonidan ijobiy baholanadi. Shunga qaramay, filmning o‘zi Triestdagi Italiya kinofestivalida mukofotga sazovor bo‘ladi.
1966-yil aktrisa uchun chinakam shuhrat keltirgan yil bo‘ladi. O‘sha paytda u ekranlarda aynan shu nomdagi filmda Qor malikasi rolida namoyon bo‘ladi. Aytish joizki, bugungi kunda ham tomoshabinlar bu filmni zavq bilan tomosha qilishadi.
Shundan so‘ng erkaklar Natalyaga haddan tashqari ko‘p e’tibor bera boshlashadi. Bundan jahli chiqqan eri xotinini rashk qilib, janjal chiqaradi. 1970-yillarning o‘rtalarida Klimova Zamanskiyni tashlab, Igor Klimovga turmushga chiqadi. Biroq 2 yil o‘tgach, sobiq eri Vladimir bilan yarashadi, ammo ikkinchi erining familiyasida qoladi.
Og‘ir kasallik
Natalya Ivanovna ishtirokidagi so‘nggi film 1970-yilda chiqdi, shundan so‘ng u suratga tushishni to‘xtatadi. Aktrisa teatrdan ham ketadi. Biroq bularning barchasi Klimovaning o‘z ixtiyori bilan sodir bo‘lmaydi, chunki o‘sha davrda unga sil tashxisi qo‘yilgandi, bu esa uzoq muddatli davolanishni talab qilardi. Ayol tashqi dunyodan butunlay ajralib, o‘ziga kelguncha eri faol ishlashda davom etadi va 1989-yilda Xalq artisti unvonini oladi.
90-yillarning boshiga kelib aktrisa butunlay sog‘ayadi. Aslida Klimova kasalligi tufayli kino va teatrdan voz kechganidan minnatdor edi, chunki Natalya ko‘pincha noto‘g‘ri yo‘l tanlaganidan afsuslanardi.
Shahardan ko‘chib keyish va osoyishta hayot
Oxir-oqibat er-xotin katta shahar tashvishlaridan charchaganliklarini tushunib, Muromga ko‘chib o‘tishadi. U yerdan 1998-yilda ular ilgari hammom bo‘lgan hovli sotib olib, hayotlarini yo‘lga qo‘yishadi. Ular bog‘ga olma va olcha ekib, sabzavot yetishtirish bilan shug‘ullanishdi.
Aktyorlar shaxsiy hayotlarini ovoza qilmaslikni afzal ko‘radi. Klimova hozirda juda zaif bo‘lib qolgan eriga qaraydi. “Men tirikman, chunki meni Natalya Ivanovna sudrab yuribdi” deb tan oladi Zamanskiy. Muromda bu juftlikka katta hurmat bilan munosabatda bo‘lishadi va har doim ularga yordam berishga tayyor turishadi.
Natalya Ivanovna o‘zining aktrisalik faoliyatini eslashni yoqtirmaydi. Klimovaning fikricha, aktyorlik kasbida odam ko‘p narsadan voz kechishga va hatto o‘z tabiatiga umuman to‘g‘ri kelmaydigan yo‘l tutishga majbur bo‘ladi.
Er-xotin juda kamtarona hayot kechiradi, ammo hamma narsa yetarli ekanligini ta’kidlashadi. Bu yil Natalya Ivanovna 86 yoshga, Vladimir Petrovich esa 98 yoshga to‘ldi. Aktrisa turmush o‘rtog‘ini yo‘qotishdan juda qo‘rqadi — “Yolg‘iz qolishim mumkinligi haqidagi fikr men uchun chidab bo‘lmas darajada og‘ir”. deydi u.
Izoh (0)