Наталья Климова ўзининг қисқа муддатли кино фаолияти давомида атиги 10 та фильмда рол ўйнаган. Унинг “Қорқиз”, “Қор маликаси” ва бошқа фильмлардаги ажойиб роллари томошабинлар хотирасида абадий сақланиб қолади.
Ижодининг бошланиши
Наталя Климова (қизлик фамилияси — Малкина) 1938 йилда туғилган. Мактабни тугатгач, қурилиш институтига ўқишга киради. Бироқ биринчи курсдан сўнг у актриса бўлишни хоҳлаётганини тушунади. У ҳужжатларини МХАТ мактаб-студиясига топшириб, барча имтиҳонлардан ўтади. 1963 йилда Наталя ўқишни тугатади — шу йили “Ибтидо ва интиҳо” фильмида ўзининг биринчи ва шу билан бирга асосий ролини ўйнайди.
Оташин муҳаббат
Бир мунча вақт актриса “Замондош” театрида ишлаган, аммо ўзи ҳаётининг ўша даврини эслашни ёқтирмайди. Наталя Ивановна шундай дейди: “Замондош” даҳшатли жой эди — худди бўрихона, унда актёрлар бир-бирини ғажиб ташлашарди. У ерда нафрат ва ҳасад ҳукмронлик қиларди”. У ерда фақат Владимир Заманский билан бирга ишлаш ёқарди холос.
Ўша вақтларда Владимирнинг яшайдиган жойи йўқ эди, шунинг учун у театр омборхонасида тунаб юради. Бир куни Наталя Заманский совқотганини ўйлаб, унга қўлқоп олиб келади, актёр қиздан жуда миннатдор эди, лекин эвазига ҳеч нарса таклиф қила олмайди. Гарчанд Климованинг эътироф этишича, улар бир кўришдаёқ севиб қолмаган бўлсалар-да, уларнинг ишқий муносабатлари шу тариқа бошланади.
4-курсда актриса ҳомиладор бўлиб қолади, лекин аборт қилдиради, кейинчалик бу ишидан жуда афсусланади. Наталя Ивановна: “Аҳмоқлик қилдим...” дер, Заманский эса кўзлари жиққа ёшга тўлган ҳолда: “Худбинлик...” дейди.
1962 йилда яшаш жойи бўлмаса-да, ёшлар турмуш қуради. Айтганча, актрисанинг эри ундан 12 ёш катта, аммо ёшдаги бундай фарқ актёрларнинг шахсий бахтини қуришига тўсқинлик қилмайди.
Наталя Климованинг юлдузлик даври
Кинодаги дебютидан бир йил ўтгач, Наталя “Ўртоқ Арсений” фильмида рол ижро этади. 1965 йилда у “Муҳандис Гариннинг гиперболоиди” фильмида Зоя Монроз образини яратади, бироқ бу рол на томошабинлар, на танқидчилар томонидан ижобий баҳоланади. Шунга қарамай, фильмнинг ўзи Триэстдаги Италия кинофестивалида мукофотга сазовор бўлади.
1966 йил актриса учун чинакам шуҳрат келтирган йил бўлади. Ўша пайтда у экранларда айнан шу номдаги фильмда Қор маликаси ролида намоён бўлади. Айтиш жоизки, бугунги кунда ҳам томошабинлар бу фильмни завқ билан томоша қилишади.
Шундан сўнг эркаклар Наталяга ҳаддан ташқари кўп эътибор бера бошлашади. Бундан жаҳли чиққан эри хотинини рашк қилиб, жанжал чиқаради. 1970 йилларнинг ўрталарида Климова Заманскийни ташлаб, Игор Климовга турмушга чиқади. Бироқ 2 йил ўтгач, собиқ эри Владимир билан ярашади, аммо иккинчи эрининг фамилиясида қолади.
Оғир касаллик
Наталя Ивановна иштирокидаги сўнгги фильм 1970 йилда чиқди, шундан сўнг у суратга тушишни тўхтатади. Актриса театрдан ҳам кетади. Бироқ буларнинг барчаси Климованинг ўз ихтиёри билан содир бўлмайди, чунки ўша даврда унга сил ташхиси қўйилганди, бу эса узоқ муддатли даволанишни талаб қиларди. Аёл ташқи дунёдан бутунлай ажралиб, ўзига келгунча эри фаол ишлашда давом этади ва 1989 йилда Халқ артисти унвонини олади.
90 йилларнинг бошига келиб актриса бутунлай соғаяди. Аслида Климова касаллиги туфайли кино ва театрдан воз кечганидан миннатдор эди, чунки Наталя кўпинча нотўғри йўл танлаганидан афсусланарди.
Шаҳардан кўчиб кейиш ва осойишта ҳаёт
Охир-оқибат эр-хотин катта шаҳар ташвишларидан чарчаганликларини тушуниб, Муромга кўчиб ўтишади. У ердан 1998 йилда улар илгари ҳаммом бўлган ҳовли сотиб олиб, ҳаётларини йўлга қўйишади. Улар боғга олма ва олча экиб, сабзавот етиштириш билан шуғулланишди.
Актёрлар шахсий ҳаётларини овоза қилмасликни афзал кўради. Климова ҳозирда жуда заиф бўлиб қолган эрига қарайди. “Мен тирикман, чунки мени Наталя Ивановна судраб юрибди” деб тан олади Заманский. Муромда бу жуфтликка катта ҳурмат билан муносабатда бўлишади ва ҳар доим уларга ёрдам беришга тайёр туришади.
Наталя Ивановна ўзининг актрисалик фаолиятини эслашни ёқтирмайди. Климованинг фикрича, актёрлик касбида одам кўп нарсадан воз кечишга ва ҳатто ўз табиатига умуман тўғри келмайдиган йўл тутишга мажбур бўлади.
Эр-хотин жуда камтарона ҳаёт кечиради, аммо ҳамма нарса етарли эканлигини таъкидлашади. Бу йил Наталя Ивановна 86 ёшга, Владимир Петрович эса 98 ёшга тўлди. Актриса турмуш ўртоғини йўқотишдан жуда қўрқади — “Ёлғиз қолишим мумкинлиги ҳақидаги фикр мен учун чидаб бўлмас даражада оғир”. дейди у.
Изоҳ (0)