Faqat birgina obraz bilan tomoshabin xotirasida qolish har qanday aktyor faoliyati uchun halokatdir. Ekrandagi qahramon boshqa filmlarda butkul o‘zga rolni ijro etishi ba’zi muxlislarning salbiy munosabatiga olib kelishi mumkin. Quyida ularga mashhurlik keltirgan obrazlarni ijro etgandan afsuslangan aktyorlar haqida so‘z boradi.
Archil Gomiashvili
Rejissyor Leonid Gaydayning “12 ta stul” komediyasida Ostap Bender ismli qahramonni ijro etgan Archil mazkur rolga katta raqobatdan so‘ng sazovor bo‘lgan. Bosh qahramon roli uchun ikki yuzdan ortiq aktyorlar, jumladan, Spartak Mishulin, Vladimir Visotskiy, Muslim Magomayev va Andrey Mironov kabilar kastingdan o‘ta olmagan.
Rejissyor avvaliga Visotskiy bilan filmni suratga ola boshlagan, ammo natijalar Gaydayga yoqmagach, unga Archil Mixaylovichni taklif etishgan. U o‘sha vaqtlar “Ostap Benderning sarguzashtlari” monospektaklida chiqish qilayotgan edi. Yuz ifodalaridan tortib ayyor nigohigacha Benderni mahorat bilan ijro etganini ko‘rgan rejissyor Archilni filmga taklif etdi va “12 ta stul” filmi ulkan muvaffaqiyatga erishdi
Biroq Gomiashvili o‘z rolidan qoniqmadi. Aktyor so‘zlariga ko‘ra, filmdan ko‘ra uning teatrdagi ijrosi yaxshiroq chiqqan.
“Film yaxshi montaj qilingan, rejissyor Leonid Gayday esa komediya janri qonunlarini juda yaxshi biladi. Ammo loyiha kamchiliklardan xoli emas. Asarda Ostapning ruhiyatiga e’tibor berilmadi. Men bu rolni shoshgan holatda — filmni suratga olish ritmida ijro etdim”.
Qolaversa, menga boshqa aktyor ovoz bergandi. Filmni boshqa ovozda ko‘rgach o‘zimni juda yomon his qildim. Premyeradan so‘ng Gaydayga qarata: Bu rolni qanchalik o‘ynashni istamayin, agar nihoya shunday bo‘lishini bilganimda edi, suratga tushishga hech qachon rozi bo‘lmas edim, dedim. Shundan so‘ng biz besh yil davomida gaplashmadik”.
Aleksandr Demyanenko
1965-yilda “I operatsiyasi” filmi ekranlarga chiqishidan avval aktyor Aleksandr Demyanenkoga boshqa filmlar uchun bosh rollar taklifini berishgan. U “Davlat jinoyatchisi”, “Dima Gorin karyerasi” filmlarida suratga tushgan.
Tabiatan kamtarin va kamgap Aleksandr Shurik obrazini mahorat bilan ijro etdi. Mazkur rolni o‘ynash aktyorga umuman qiyinchilik tug‘dirmadi, biroq kelgusida rejissyor Gayday bilan tuzilgan loyiha yana davom etishi haqida aktyor bexabar edi.
Doimo drama yo‘nalishida ishlashni istasa-da, “I operatsiyasi va Shurikning boshqa sarguzashtlari” filmi uchun Demyanenko Gamlet rolidan voz kechishga majbur bo‘ldi. Ko‘chalarda uni ko‘rib qolganlar “Ana, Shurik kelyapti” deya baqirishlari unga hech ham yoqmas edi:
“60 yoshga to‘lgan bo‘lsam-da, hamon meni Shurik deb chaqirishlari doim yoqimsiz edi. Ammo sekin-asta bunga ko‘nika boshladim va muxlislar meni yuzda tabassum bilan yodga olishlari ham aslida bir baxt ekanligini angladim”, — deydi Aleksandr Demyanenko.
Mixail Kononov
Sovet aktyori Mixail Kononov “Katta tanaffus” filmida o‘qituvchi Nestor Petrovichni ijro etgach, aktyor faoliyatida katta ziddiyatlar yuzaga keldi. Mixail so‘zlariga ko‘ra, u odamlar ongida birgina obraz bilan gavdalanar, aktyorni esa boshqa loyihalarga olishni istashmas edi.
Filmni suratga olish jarayonida aktyor boshqa ishtirokchilar bilan kelishmas, ssenariyga o‘zgartirishlar kiritishga urinar va hamkasblarini doimiy tanqid qilib borar edi. Aktyor so‘zlariga ko‘ra, “Katta tanaffus” filmi uni jiddiy rollarni o‘ynash imkoniyatidan mahrum qilgan. Kononovga faqatgina “Andrey Rublyov” filmidagi Foma ismli kichik obrazi ma’qul kelgan.
Irina Muravyova
Irina Vadimovnaga “Moskva ko‘z yoshlarga ishonmaydi” filmida o‘ynagan Lyudmila Sviridova obrazi qo‘polligi va odobsiz ekanligi bilan yoqmaydi. “Eng maftunkor va jozibali” filmiga esa u avvaldan qarshi bo‘lgan va rejissyorlardan jiddiyroq filmda suratga tushish taklifini olmoqchi bo‘lgan.
Film direktori Galina Belinskaya uni rozi qilish uchun Irinaning uyiga borgan va mazkur loyihaning afzalliklari haqida aytib bergan. Muravyovaning turmush o‘rtog‘i rafiqasini qo‘llagach, aktrisa mazkur rolni ijro etishga rozi bo‘ladi va “Eng maftunkor va jozibali” filmi sovet davrining klassikasiga aylanadi.
Andrey Myagkov
“Taqdir hazili yoki qushdek yengil bo‘ling” (1975) filmidagi Jenya Lukashin obrazi aktyorga umuman yoqmaydi. Ushbu loyihadan so‘ng Myagkov haqida noto‘g‘ri tasavvurlar uyg‘ongan va rejissyorlar tomonidan yaxshi takliflar kelishi to‘xtagan.
“ ‘Taqdir hazili yoki qushdek yengil bo‘ling’ filmi mening faoliyatimga nuqta qo‘ydi. Garchi spirtli ichimliklarni yoqtirmasam ham, hamma meni alkogolga mukkasidan ketgan deb o‘ylaydi! Bu filmni har yili Yangi yil arafasida tomosha qilishdan charchamaydigan tomoshabinlarni hech tushunmayman”, — deydi aktyor.
Izoh (0)