Prezident Shavkat Mirziyoyev O‘zbekistonga rasmiy tashrif bilan kelgan Germaniya kansleri Olaf Sholsni Registon maydonida kutib oldi. Bu haqda Prezident matbuot xizmati xabar berdi.
Mamlakatning asosiy timsollaridan biri, ajdodlarimiz bunyodkorlik salohiyatining ifodasi — dunyoga mashhur Registon maydoni YUNESKOning Butunjahon merosi ro‘yxatiga kiritilgan. Ansamblga kiruvchi Mirzo Ulug‘bek, Sherdor va Tillakori madrasalari o‘zining salobati, boy tarixi va betakror arxitekturasi bilan barchada chuqur taassurot qoldiradi.
Oliy martabali mehmonga Sharq meʼmorchiligining ushbu durdonasi qurilishiga oid tarixiy maʼlumotlar, yechimlar va bezaklarning o‘ziga xos xususiyatlari, shuningdek, bu maskan bilan bog‘liq muhim voqealar va shaxslar, o‘zbek xalqining madaniy merosi haqida maʼlumot berildi.
Suhbat davomida jahon sivilizatsiyasining qadimiy beshiklaridan biri sifatida haqli ravishda eʼtirof etilgan Samarqand shahri bugungi kunda ishbilarmonlik va sayyohlik markaziga aylanib borayotgani taʼkidlandi.
Shavkat Mirziyoyev va Olaf Shols Registon ansambli oldida birgalikda suratga tushdi.
Izoh (0)