Sobiq qishloq xo‘jaligi vaziri Aziz Voitov va 49 nafar sudlanuvchi ishini ko‘rayotgan sud Jinoyat ishlari bo‘yicha Yunusobod tuman sudi binosida navbatdagi majlisini davom ettirdi. Bu haqda sudda ishtirok etgan “Daryo” jurnalisti xabar berdi.
Sud majlisi Jinoyat ishlari bo‘yicha Mirobod tuman sudi raisi Sardor Sodiqov raisligida davom ettirilib, sudlanuvchilar shaxsiga aniqlik kiritilib, ularning huquq va majburiyatlari tushuntirildi.
Sudda so‘z olgan advokatlardan biri Temur Rahmatov internet nashrlarining birida sobiq vazir Aziz Voitov ishi sudda ko‘rib chiqilgani va 7 yilga ozodlikdan mahrum qilingani yozilganini aytib, jurnalistlarni noto‘g‘ri axborot tarqatayotganlikda aybladi.
Sudda raislik qiluvchi Sardor Sodiqov OAV vakillari hamda advokatlarga murojaat qilib, sudda shaffoflik ta’minlanishi kerakligini, biroq bu sudlanuvchilarning haq-huquqlarini poymol etmasligi kerakligini ta’kidladi.
Sud jarayonini yoritishda aybsizlik prezumpsiyasiga amal qilinishi shart, dedi sud majlisi raisi.
Sudda so‘z olgan va ism-sha’rifini aytmagan yana bir advokat sudda qatnashayotgan jurnalistlar xorijliklar agenti bo‘lishi mumkinligini aytib, shu bois ularga sudni yoritishni taqiqlash kerakligini taklif qildi. Bunga javob bergan Sardor Sodiqov OAV vakillari sud majlisiga hujjat asosida kiritilayotganini, ularning qaysi OAV vakili ekani mas’ullarga aniq ekanini bildirdi.
Mazkur muhokamalar davomida sudlanuvchilardan biri ham so‘z olib, sobiq vazir masalasiga oid ishlar internetda yozilganidan so‘ng uni ham qamab qo‘yishganini gapirib, sudda OAV vakillarini “ko‘rishga ko‘zi yo‘qligini” bildirdi. “Yetti oy oldin tergov boshlangan paytda qayerda edingiz?”, deya o‘pkaladi.
Jurnalistlar esa tergov jarayonlari ketayotgan paytda OAV vakillari tergovga xalal bermasligini, shu sabab tergov jarayonlari tugamasdan turib, bu haqda yozish mumkin emasligini tushuntirdi.
Sud ishiga raislik qiluvchi Sardor Sodiqov majlis 2024-yilning 6-sentyabr kuni soat 15:00 ga qadar to‘xtatilishini, tanaffusdan so‘ng advokatlar va sudlanuvchilarning OAV ishtirokiga munosabati haqidagi iltimosnomalarni eshitib, sudda OAV vakillarining ishtiroki muhokama qilinishini, muhokamadan so‘ng majlisda jurnalistlarning foto, video va audiomateriallar olishiga ruxsat berish yoki bermasligini bildirdi.
2022-yilning avgust oyida qishloq xo‘jaligi vaziri lavozimiga tayinlangan Aziz Voitov 2023-yilning oktyabr oyida prezident qarori bilan ishdan olindi. Ko‘p o‘tmay, aniqrog‘i shu yilning dekabr oyida uning qamoqqa olingani, bunga jinoyat ishlari bo‘yicha Yashnobod tuman sudida bosh prokuror o‘rinbosari sobiq vazirni Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 3-qismi “a” bandi va 205-moddasi (hokimiyat yoki mansab vakolatini suiiste’mol qilish) 2-qismi “a” bandida nazarda tutilgan jinoyatlarni sodir etganlikda ayblagani ochiqlanib, gumon qilinuvchi Jinoyat-protsessual kodeksining 221-moddasi (ushlab turish asoslari) tartibida ushlangani aniq bo‘ldi. Bir necha oy davom etgan tergovlardan so‘ng, 2024-yilning 15-avgust kuni sobiq qishloq xo‘jaligi vaziri Aziz Voitovga nisbatan jinoyat ishi sudda ko‘rila boshlandi.
Izoh (0)