Afg‘oniston bosh vaziri vazifasini bajaruvchi mulla Abdulg‘ani Barodar xalqaro savdo markazining ochilish marosimida ishtirok etish uchun Termiz shahriga keldi. Bu haqda Khaama xabar berdi.
Barodar boshchiligidagi yuqori martabali delegatsiya tashrifi O‘zbekistonning rasmiy taklifiga binoan amalga oshgan. “Termiz xalqaro savdo markazi”ning ochilish marosimida O‘zbekiston bosh vaziri, Ozarbayjon bosh vaziri o‘rinbosari hamda Qozog‘iston va Qirg‘izistonning yuqori martabali rasmiylari ishtirok etishi kutilmoqda.
Ta’kidlanishicha, mazkur xalqaro savdo markazining birinchi qismi ikki davlat ishbilarmonlari o‘rtasidagi iqtisodiy va savdo hamkorligini rivojlantirish maqsadida qariyb ikki yil avval foydalanishga topshirilgan. “Tolibon” u ochilishi bilan afg‘on tadbirkorlari markazga vizasiz tashrif buyurishi va u yerda 10 kungacha qolishi mumkinligini bildirgan.
17-avgust kuni O‘zbekiston bosh vaziri Abdulla Aripov Kobulga bordi. Tashrif doirasida ikki tomonlama uchrashuvlar o‘tkazilib, qator masalalar muhokama qilindi. O‘zaro savdo aylanmasini 2024-yilda 1 milliard dollarga, yaqin istiqbolda esa 3 milliard dollarga yetkazish rejalashtirilmoqda.
Izoh (0)