O‘zbekistondan o‘tgan 6 oyda xorijda ishlash istagida bo‘lgan 64 ming nafar shaxs chet davlatlarga qonuniy, xavfsiz hamda uyushgan holda ishga yuborilgani ma’lum qilindi.
Xabar berilishicha, bu o‘tgan yilning mos davriga nisbatan 3 baravarga ko‘p. Joriy yilning o‘tgan davrida xorijga vaqtincha ishga yuborish bo‘yicha ham salmoqli ishlar qilingani, mamlakatlar geografiyasi rivojlangan davlatlar hisobiga kengaygani ta’kidlandi.
Joriy yilning II yarim yilligida 90 ming nafar shaxsni Janubiy Koreya, Germaniya, Buyuk Britaniya, Yaponiya, Ruminiya, Bolgariya, Vengriya, kabi rivojlangan davlatlarda ishga joylashtirish rejalashtirilgan.
Bularning barchasi “Xorijga ish — mahalladan” tamoyili asosida yo‘lga qo‘yiladi.
Shuningdek, yil oxirigacha 115 ming ishsiz aholi kasb-hunar, tadbirkorlik ko‘nikmalari va xorijiy tillarga o‘qitiladi.
Kambag‘allikni qisqartirish va bandlik vazirining “Mehnat migrantlariga subsidiya, kompensatsiya ajratish tartibi to‘g‘risidagi nizomni tasdiqlash haqida”gi buyrug‘i loyihasi e’lon qilindi. Ushbu nizom prezidentning 2024-yil 4-apreldagi “Mehnat migratsiyasi jarayonlarini takomillashtirish hamda xorijda vaqtincha mehnat faoliyatini amalga oshirayotgan shaxslarni qo‘llab-quvvatlashga doir qo‘shimcha chora-tadbirlar to‘g‘risida”gi qaroriga muvofiq, vaqtinchalik mehnat faoliyatini amalga oshirish uchun xorijga ketayotgan, shuningdek, xorijda mehnat faoliyatini amalga oshirayotgan O‘zbekiston fuqarolariga subsidiya, kompensatsiya ajratish tartibini belgilaydi.
Izoh (0)