Navoiyda 19 ming dollar evaziga AQSHga ishga yuborishni va’da qilgan shaxs ushlandi

Navoiy va Samarqandda AQSH va Shvetsiyaga ishga yuborishni va’da qilib, firibgarlik yo‘li bilan pul olgan shaxslar ushlandi.

Bosh prokuratura huzuridagi departament hamda DXXning Navoiy viloyati boshqarmalari tomonidan o‘tkazilgan tezkor tadbirda fuqaro R.K. fuqaro L.K.ning ishonchiga kirib, uni 19 ming dollar evaziga Turkiya va Meksika orqali AQSHga olib o‘tib, ushbu davlatda ishga joylashtirishini aytib, oldindan 6 200 dollarni olgan vaqtida ashyoviy dalillar bilan ushlangan.

Departamentning Samarqand shahar bo‘limi tomonidan o‘tkazilgan tergovga qadar tekshiruvda esa fuqaro U.E. to‘rt nafar fuqaroning ishonchiga kirib, ularni Turkiya orqali Shvetsiyaga ishlash uchun yuborishini va’da qilib, jami 14 300 dollarni firibgarlik yo‘li bilan qo‘lga kiritgani aniqlangan.  

Mazkur holatlar yuzasidan Jinoyat kodeksining 25, 168-moddasi (firibgarlik) bilan jinoyat ishlari qo‘zg‘atilib, tergov harakatlari o‘tkazilmoqda.