AQSH davlat departamenti rahbari Entoni Blinken Isroil HAMAS bilan kelishuv doirasida G‘azodan qo‘shinlarini olib chiqishga rozi bo‘lganini ma’lum qildi.
![](/static/2024/08/21/photo_2024-08-21_18-50-55-NjwvYjw7.jpg)
Qo‘shma Shtatlar G‘azoning Isroil tomonidan uzoq muddatli bosib olinishini qabul qilmaydi. Aniqrog‘i, kelishuvda G‘azodan Isroil qo‘shinlarini olib chiqish vaqti va joylari juda aniq belgilangan va Isroil bunga rozi bo‘lgan. Men bilganim shu, deydi Blinken.
U Isroil va HAMAS o‘rtasidagi kelishuv “yaqin kunlarda tuzilishi kerakligini” ta’kidlagan va Qo‘shma Shtatlar “buni amalga oshirishda qo‘lidan kelganicha harakat qilishiga” va’da bergan.
Axios nashriga ko‘ra, Isroil bosh vaziri Binyamin Netanyaxu avvalroq mamlakat armiyasi G‘azoning janubiy va markaziy qismidagi ikkita hududdan strategik ustunlikni saqlab qolish uchun chekinmasligini aytgan edi.
Isroil bosimga qaramay Filadelfiya va Netzarim koridorini tark etmaydi. Bular strategik harbiy va siyosiy aktivlardir. Bu haqda Blinkenga aytdim.Men uni ko‘ndira oldim deb o‘ylayman, degan edi Netanyaxu.
Blinken 19-avgust kuni Netanyaxu bilan uchrashgandan so‘ng, Isroil G‘azoda o‘t ochishni to‘xtatishga to‘sqinlik qiluvchi kelishmovchiliklarni bartaraf etish uchun Vashington taqdim etgan kelishuvni qabul qilganini aytgan va HAMASni ham shunday qilishga chaqirgan. Falastin fraksiyasi taklifni rad etmagan, biroq yangi taklif avval kelishilgan shartlarni bekor qilganini aytgan.
Blinkenning bayonotini sharhlar ekan, HAMASning yuqori martabali rasmiysi Sami Abu Zuhriy AQSH davlat departamenti rahbari “yolg‘on doirasida qolishni talab qilayotgani va bu kelishuvga erishish uchun urinishlar muvaffaqiyatsizlikka uchraganining sabablaridan biri” ekanini aytgan.
Izoh (0)