Остона шаҳрида Марказий Осиёнинг энг кучли билимдонларини ўзида жамлаган “Заковат” интеллектуал ҳаракатининг Осиё кубоги бўлиб ўтди. Бу мусобақа қардош халқлар ўртасида дўстлик ва билим алмашинувини мустаҳкамлаш учун ажойиб имконият бўлди. Ўзаро билимлар беллашувида Ўзбекистон ва Қозоғистон терма жамоалари иштирок этди.
Тадбир очилишида сўз олган Ўзбекистон президентининг ёрдамчиси Саида Мирзиёева “Заковат” интеллектуал ўйини каби мусобақалар икки халқни янада жипслаштиришга хизмат қилишини таъкидлади.
“Бугун Ўзбекистон ва Қозоғистон ўртасидаги дўстона муносабатлар бутун дунёга намунадир! Бизнинг йўлбошчиларимиз энг муҳим саволларга жавоб топа олдилар. Ер юзида зиддиятлар кучайган бир пайтда, Шавкат Мирзиёев ва Қосим-Жўмарт Тўқаев сиёсий тандеми Марказий Осиёни энг хавфсиз, гуллаб-яшнаётган дўстона ҳудудга айлантиришга интилмоқда”, деди Саида Мирзиёева.
Саида Мирзиёева Ўзбекистон ва Қозоғистон кучларини бирлаштираётгани ҳақида гапирди.
“Сўнгги кунларда қозоғистонликлар ўзбек спортчиларининг ғалабасига қанчалик хурсанд бўлаётганини, бизнинг мухлисларимиз эса сизнинг чемпионларингизни олқишлаётганини интернетда бир кўринг. Олимпиададаги биринчи олтин медалларни қозоғистонлик Елдас Сметов ва ўзбекистонлик Диёра Келдиёрова қўлга киритдилар.
Рухсатингиз билан шу саҳнадан туриб, яна бир марта таъкидламоқчиман: Диёра, биз сен билан фахрланамиз, баракалла!”, дейди Саида Мирзиёева.
Изоҳ (0)