Markaziy bankning Bank nazorati qo‘mitasi iyul oyidagi yig‘ilishlarida (8-marta) 59 ta masalani ko‘rib chiqdi va ular bo‘yicha tegishli qarorlarni qabul qildi. Bu haqda Markaziy bank matbuot xizmati xabar berdi.
Maʼlum qilinishicha, ro‘yxatga olish va ruxsat berish yo‘nalishida 51 ta masala, jumladan:
- kredit tashkilotlari ustaviga kiritilgan o‘zgartirishlarni ro‘yxatdan o‘tkazish (12 ta);
- to‘lov tashkilotlarining tashkiliy-huquqiy shakli aksiyadorlik jamiyatiga o‘zgarganligi munosabati bilan to‘lov tashkiloti faoliyatini amalga oshirish uchun berilgan litsenziyani qayta rasmiylashtirish (12 ta);
- tijorat banklarining chet elda vakolatxona ochishga ruxsatnoma berish (1 ta);
- mikromoliya tashkilotlarini hisob ro‘yxatidan o‘tkazish (1 ta);
- tijorat banklari kuzatuv kengashi va boshqaruvi aʼzolari, shuningdek, muhim ahamiyatga ega xodimlarining nomzodlarini ko‘rib chiqishga doir (21 ta) masalalar ko‘rildi.
Shu bilan birga, to‘lov tizimi operatori (1 ta) hamda to‘lov tashkiloti faoliyatini (3 ta) amalga oshirish uchun berilgan litsenziya chaqirib olindi.
Kredit tashkilotlarining moliyaviy holatiga oid 8 ta masala — Markaziy bankning ko‘rsatmalari va prudensial meʼyorlari talablarining bajarilishi, mikromoliya tashkilotida o‘tkazilgan tekshirishlar natijasi ham muhokama qilindi.
To‘lov tizimlari operatorlari va to‘lov tashkilotlarining ustav fondi va tashkiliy-huquqiy shakliga qo‘yilgan talablarga rioya qilmaganligi uchun 13 ta to‘lov tizimlari operatorlari hamda to‘lov tashkilotlariga nisbatan chora va sanksiyalar qo‘llanilishi to‘g‘risida ogohlantirildi.
Shuningdek, amalga oshirilgan nazorat tadbirlari davomida banklar tomonidan isteʼmolchilar bilan o‘zaro munosabatlarni amalga oshirishda amaldagi qonunchilikka rioya qilinmaganligi uchun 20 ta tijorat banki ogohlantirildi.
“Bundan tashqari, qo‘mita tomonidan bank tizimi barqarorligini saqlash, omonatchilar va investorlar huquqlarini himoya qilish tamoyilidan kelib chiqib, tijorat banklari boshqaruvlari va mikromoliya tashkilotlari rahbariyatlariga aniqlangan kamchiliklarni tuzatish, ular bo‘yicha tegishli chora-tadbirlar ishlab chiqish, o‘rnatilgan prudensial normativlarga amal qilish, bank faoliyatida mavjud zaifliklarni bartaraf etish va moliyaviy holatini sog‘lomlashtirishga qaratilgan talablarga rioya qilish yuzasidan tegishli ko‘rsatmalar berildi”, deyiladi xabarda.
Izoh (0)