Украина президенти Владимир Зеленский Россия қўшинлари Украинанинг босиб олинган ҳудудларини тарк этгунига қадар ўт очишни тўхтатиш талабларини яна бир бор рад этди.
Шу билан бирга, Зеленский урушни адолатли якунлашнинг учта омилини — сабр-тоқат, халқаро ҳамжамият томонидан қўллаб-қувватлаш ва Москвага дипломатик босим ўтказишни айтиб ўтган.
Агар АҚШ ва Европа давлатлари Россиянинг Украинага қарши ҳарбий тажовузи борасидаги сиёсатда бирдам бўлса, бу қўшимча босим ўтказади ва Москвага ҳеч қандай имконият йўқлигини кўрсатади, дея тушунтирган у.
Зеленский бошқа давлатлар билан Украинанинг ҳудудий яхлитлиги ва бошқа мавзуларда батафсил муҳокамаларни бошлаш режаларини маълум қилган. Унинг сўзларига кўра, ноябрь охиригача тинчликка эришиш учун ҳаракат режаси тайёрланиши кутилмоқда.
Украина президенти, шунингдек, Киев расмийлари АҚШ президентлигига номзод Дональд Трамп ва унинг эҳтимолий рақиби, вице-президент Камала Ҳарриснинг сайловолди штаб-квартираси билан алоқа ўрнатганини айтган.
Уруш бошланганидан бери Киев Москва билан тинчлик музокаралари фақат рус қўшинлари мамлакат ҳудудидан унинг халқаро тан олинган чегаралари доирасида олиб чиқиб кетилгандан кейингина мумкин бўлишини бир неча бор таъкидлаган.
Киев мери Виталий Кличко аввалроқ ҳудудий муросага келиш имкониятини тан олган, бироқ Украина расмийлари бу баёнотга изоҳ бермаган.
Изоҳ (0)