Rossiya mudofaa vaziri Andrey Belousov 12-iyul kuni amerikalik hamkasbi Lloyd Ostin bilan bog‘lanib, unga Ukraina Rossiyaga qarshi tayyorlanayotgan ehtimoliy “yashirin operatsiya” haqida ma’lum qildi. Bu haqda The New York Times (NYT) manbalarga tayanib xabar berdi.
Belousov Pentagon rahbari bilan 25-iyun kuni mudofaa vaziri etib tayinlanganidan keyin birinchi marta suhbatlashgan va bir necha hafta o‘tgach, u Lloydga “ogohlantirish” uchun qo‘ng‘iroq qilgan, dedi ism-sharifi oshkor qilinmagan uch amaldor nashrga.
NYT ta’kidlashicha, rossiyalik vazir Pentagonning Moskvaga qarshi “fitna”dan xabardorligi haqida so‘ragan. Belousov, shuningdek, bo‘lajak “maxfiy operatsiya” Qo‘shma Shtatlar tomonidan ma’qullanganini aytgan.
Pentagon rasmiylari bu “iddao”dan hayratlanib, ular hech qanday fitnadan xabari yo‘qligini aytgan. Nashr manbalarining taʼkidlashicha, Vashington Belousovning gaplarini AQSH ukrainaliklar bilan bog‘lanishi va agar haqiqatan ham mavjud bo‘lsa, Rossiyaga qarshi rejalaridan voz kechishga undashi uchun yetarlicha jiddiy qabul qilgan.
Ukraina harbiy, razvedka va diplomatik qo‘llab-quvvatlash borasida AQSHga qaram bo‘lishiga qaramay, ukrainalik rasmiylar amerikalik hamkasblari bilan harbiy amaliyotlari, xususan, Rossiyaning chegara ortidagi nishonlariga qarshi operatsiyalari to‘g‘risida ochiqchasiga gapiravermaydi, deyiladi xabarda.
Ikki vazirning 12-iyul kuni bo‘lib o‘tgan telefon suhbati haqida Rossiya Mudofaa vazirligi va Pentagon matbuot kotibi o‘rinbosari Sabrina Singx xabar bergan. U suhbat Rossiya tashabbusi bilan boshlangan va Ostin suhbat davomida “aloqa kanallarini ochiq saqlash” muhimligini taʼkidlagan.
Rossiya Mudofaa vazirligining aniqlik kiritishicha, vazirlar xavfsizlikka tahdidlarning oldini olish va ehtimoliy eskalatsiya xavfini kamaytirish masalasini muhokama qilgan.
Izoh (0)