Россия мудофаа вазири Андрей Белоусов 12 июль куни америкалик ҳамкасби Ллойд Остин билан боғланиб, унга Украина Россияга қарши тайёрланаётган эҳтимолий “яширин операция” ҳақида маълум қилди. Бу ҳақда The New York Times (NYT) манбаларга таяниб хабар берди.
Белоусов Пентагон раҳбари билан 25 июнь куни мудофаа вазири этиб тайинланганидан кейин биринчи марта суҳбатлашган ва бир неча ҳафта ўтгач, у Ллойдга “огоҳлантириш” учун қўнғироқ қилган, деди исм-шарифи ошкор қилинмаган уч амалдор нашрга.
NYT таъкидлашича, россиялик вазир Пентагоннинг Москвага қарши “фитна”дан хабардорлиги ҳақида сўраган. Белоусов, шунингдек, бўлажак “махфий операция” Қўшма Штатлар томонидан маъқулланганини айтган.
Пентагон расмийлари бу “иддао”дан ҳайратланиб, улар ҳеч қандай фитнадан хабари йўқлигини айтган. Нашр манбаларининг таъкидлашича, Вашингтон Белоусовнинг гапларини АҚШ украиналиклар билан боғланиши ва агар ҳақиқатан ҳам мавжуд бўлса, Россияга қарши режаларидан воз кечишга ундаши учун етарлича жиддий қабул қилган.
Украина ҳарбий, разведка ва дипломатик қўллаб-қувватлаш борасида АҚШга қарам бўлишига қарамай, украиналик расмийлар америкалик ҳамкасблари билан ҳарбий амалиётлари, хусусан, Россиянинг чегара ортидаги нишонларига қарши операциялари тўғрисида очиқчасига гапиравермайди, дейилади хабарда.
Икки вазирнинг 12 июль куни бўлиб ўтган телефон суҳбати ҳақида Россия Мудофаа вазирлиги ва Пентагон матбуот котиби ўринбосари Сабрина Сингх хабар берган. У суҳбат Россия ташаббуси билан бошланган ва Остин суҳбат давомида “алоқа каналларини очиқ сақлаш” муҳимлигини таъкидлаган.
Россия Мудофаа вазирлигининг аниқлик киритишича, вазирлар хавфсизликка таҳдидларнинг олдини олиш ва эҳтимолий эскалация хавфини камайтириш масаласини муҳокама қилган.
Изоҳ (0)