Eronda so‘nggi haftada yuz bergan o‘ta issiq ob-havo tufayli davlat muassasalari va banklar faoliyatini to‘xtatgan. Bu haqda Erondagi manbalarga tayanib, Al Arabiya nashri xabar berdi.
Manbaga ko‘ra, jazirama issiq tufayli mamlakatda iqlim o‘zgartiruvchi qurilmalarga talab nihoyatda oshib ketgan. Bu esa mamlakatda energiya isteʼmolini sezilarli oshirib yuborgan.
Elektrga bo‘lgan talabning oshib ketishi mamlakat bo‘ylab energetika inqirozi xavfini yuzaga keltirgan. Hukumat bunga qarshi turish uchun shanba va yakshanba kuni faoliyat yuritmaydigan muassasalarni tarmoqdan vaqtincha uzishni boshlagan.
Tehron rasmiylari maxsus qaror chiqarib, qator davlat birlashmalarida mehnat soatlarini qisqartirgan. Quyi bo‘g‘indagi ko‘plab davlat muassasalari va banklar yopib qo‘yilgan.
Ob-havo o‘zgarishlarini kuzatish markazi bergan maʼlumotlarga ko‘ra, 27-iyul kuni poytaxt Tehronda harorat Selsiy shkalasi bo‘yicha 37 darajadan pastga tushmagan. Mamlakat bo‘yicha kunlik eng yuqori harorat 42 gradusga yetgani bildirilgan.
Mamlakat bo‘ylab banklar, idoralar va davlat muassasalari odamlarning sog‘lig‘ini himoya qilish va energiyani tejash maqsadida yopilishda davom etayotgani bildirilgan. Dam olish kunlarida faqat shoshilinch xizmatlar va tibbiy muassasalar ishlashiga ruxsat berilgan.
Eron ommaviy axborot vositalari fuqarolarni kechki 17:00 gacha uyda qolishlari haqida ogohlantirgan. Harorat yuqori paytda ko‘chada yurish jiddiy muammolarga olib kelishi aytilgan.
Ayni damda Eronda so‘nggi 50 yildagi eng issiq harorat kuzatilmoqda. Mamlakat janubiy viloyatlarida issiq urishidan hushini yo‘qotgan fuqarolar soni nihoyatda ko‘paygan. Tahlilchilar yaqin haftalarda jazirama issiq saqlanib turishini xabar berishgan.
Izoh (0)