Эронда сўнгги ҳафтада юз берган ўта иссиқ об-ҳаво туфайли давлат муассасалари ва банклар фаолиятини тўхтатган. Бу ҳақда Эрондаги манбаларга таяниб, Al Arabiya нашри хабар берди.
Манбага кўра, жазирама иссиқ туфайли мамлакатда иқлим ўзгартирувчи қурилмаларга талаб ниҳоятда ошиб кетган. Бу эса мамлакатда энергия истеъмолини сезиларли ошириб юборган.
Электрга бўлган талабнинг ошиб кетиши мамлакат бўйлаб энергетика инқирози хавфини юзага келтирган. Ҳукумат бунга қарши туриш учун шанба ва якшанба куни фаолият юритмайдиган муассасаларни тармоқдан вақтинча узишни бошлаган.
Теҳрон расмийлари махсус қарор чиқариб, қатор давлат бирлашмаларида меҳнат соатларини қисқартирган. Қуйи бўғиндаги кўплаб давлат муассасалари ва банклар ёпиб қўйилган.
Об-ҳаво ўзгаришларини кузатиш маркази берган маълумотларга кўра, 27 июль куни пойтахт Теҳронда ҳарорат Цельсий шкаласи бўйича 37 даражадан пастга тушмаган. Мамлакат бўйича кунлик энг юқори ҳарорат 42 градусга етгани билдирилган.
Мамлакат бўйлаб банклар, идоралар ва давлат муассасалари одамларнинг соғлиғини ҳимоя қилиш ва энергияни тежаш мақсадида ёпилишда давом этаётгани билдирилган. Дам олиш кунларида фақат шошилинч хизматлар ва тиббий муассасалар ишлашига рухсат берилган.
Эрон оммавий ахборот воситалари фуқароларни кечки 17:00 гача уйда қолишлари ҳақида огоҳлантирган. Ҳарорат юқори пайтда кўчада юриш жиддий муаммоларга олиб келиши айтилган.
Айни дамда Эронда сўнгги 50 йилдаги энг иссиқ ҳарорат кузатилмоқда. Мамлакат жанубий вилоятларида иссиқ уришидан ҳушини йўқотган фуқаролар сони ниҳоятда кўпайган. Таҳлилчилар яқин ҳафталарда жазирама иссиқ сақланиб туришини хабар беришган.
Изоҳ (0)