Boshqa davlatlar Xitoyning o‘z suverenitetini himoya qilish qatʼiyatini past baholamasligi, Tayvan masalasi bo‘yicha kimdir chegarani kesib o‘tishi va buning badalini to‘lamasligi mumkin degan xayolga bormasligi kerak. Bu haqda Xitoy TIV matbuot kotibi Lin Jian ma’lum qildi.
Xitoy avvalroq AQSHning oltita harbiy-sanoat korxonasiga hamda ushbu kompaniyalarning beshta top-menejerlariga Tayvanga qurol sotgani uchun sanksiyalar kiritgan edi.
AQSHning Tayvanga qurol sotishi “yagona Xitoy” tamoyilini va uchta qo‘shma Xitoy—AQSH kommyunikelari qoidalarini jiddiy ravishda buzadi. Bu Xitoyning ichki ishlariga qo‘pol aralashuv hisoblanib, mamlakat suvereniteti hamda hududiy yaxlitligiga jiddiy zarar yetkazadi, deydi Lin Jian kiritilgan sanksiyalarni sharhlar ekan.
Uning ta’kidlashicha, Tayvan masalasi Xitoy—Amerika munosabatlaridagi birinchi “qizil chiziq” bo‘lib, uni kesib o‘tib bo‘lmaydi.
Hech bir davlat, tashkilot yoki shaxs XXR hukumati va xalqining milliy suverenitet hamda hududiy yaxlitlikni himoya qilish borasidagi qat’iyati va ulkan imkoniyatlarini e’tibordan chetda qoldirmasligi kerak. Hech kim Tayvan masalasida chegarani buzib, buning uchun tovon to‘lamayman, degan xayolda bo‘lmasin, deya qo‘shimcha qilgan xitoylik diplomat.
Tayvan atrofidagi vaziyat 2022-yil avgustida AQSH Kongressi Vakillar palatasining o‘sha paytdagi spikeri Nensi Pelosi orolga tashrif buyurganidan keyin sezilarli darajada yomonlashgan edi. Xitoy Pelosining tashrifini AQSHning Tayvan separatizmini qo‘llab-quvvatlashi sifatida qoralagan va keng ko‘lamli harbiy mashg‘ulotlar o‘tkazgan.
Izoh (0)