Qozog‘istonning Ostona shahrida 937 nafar muhojirni bir xonali kvartiraga ro‘yxatdan o‘tkazgan shaxs sudlandi. Bu haqda shahar prokuraturasi matbuot xizmatiga tayanib “Zakon.kz” xabar berdi.
Sud hukmi bilan mazkur xonadon egasi Jinoyat kodeksining 394-moddasi 1-qismi bilan aybdor deb topildi, deyiladi xabarda.
Poytaxt prokuraturasi tomonidan migratsiya qonunchiligi talablariga rioya etilishi yuzasidan o‘tkazilgan tekshiruv doirasida umumiy maydoni 35,7 kv/m bo‘lgan turar joyga 937 nafar kishi ro‘yxatga olingan.
Qayd etilishicha, xonadon egasiga noqonuniy migratsiyani tashkil etish bo‘yicha jinoiy ish qo‘zg‘atilgan. Prokuror mahkumning noqonuniy migratsiyani tashkil etishda aybdorligini turar joy bilan ta’minlash orqali isbotlagan. Sud hukmi qonuniy kuchga kirgan.
Prokurorlar, shuningdek, soxta manzillarda va “rezina kvartiralar”da ro‘yxatdan o‘tgan jami 22 ming chet el fuqarosini aniqlagan. Tekshiruv natijalariga ko‘ra, hujjatlarni qalbakilashtirish, chegarani noqonuniy kesib o‘tish, sud hujjatlariga rioya qilmaslik va boshqa huquqbuzarliklar bo‘yicha jami 42 ta tergovga qadar tekshiruvlar o‘tkazilgan.
Izoh (0)