BMTning Iqtisodiy va ijtimoiy masalalar bo‘yicha departamenti hisobotiga ko‘ra, XXI asrning 80-yillariga kelib dunyo aholisi maksimal darajaga yetadi.
“Dunyo aholisi yana 50-60 yil o‘sishda davom etishi kutilmoqda, 2080-yillarning o‘rtalariga kelib taxminan 10,3 milliardga yetadi. Hozir 2024-yilda bu ko‘rsatkich 8,2 milliardni tashkil etadi. Aholi sonining eng yuqori cho‘qqisiga erishilgandan keyin uning qisqarishi, ya’ni asr oxiriga kelib 10,2 milliard kishiga tushishi kuzatiladi”, deydi hisobot mualliflari.
BMT ma’lumotlariga ko‘ra, hozirda dunyo aholisining to‘rtdan bir qismi aholisi eng yuqori ko‘rsatkichlarga erishgan mamlakatlarda — Xitoy, Germaniya, Yaponiya va Rossiyada istiqomat qiladi. Mutaxassislarning fikricha, asr oxiriga kelib Xitoy, Yaponiya va Rossiyada aholi soni eng ko‘p qisqaradi.
“Hozirda sayyoramizda o‘rtacha umr ko‘rish 73,3 yoshni tashkil etadi – u allaqachon koronavirus pandemiyasigacha bo‘lgan darajaga qaytgan”, deya qayd etadi hisobot mualliflari.
Tahlilchilarga ko‘ra, 2054-yilga borib o‘rtacha umr ko‘rish yoshi 77,4 yoshga yetadi.
“2080-yilga borib, 65 yoshdan oshganlar soni 18 yoshgacha bo‘lganlarnikidan ko‘p bo‘ladi. 2070-yillarning oxiriga kelib, qariyalar soni 2,2 milliardga yetadi”, deyiladi hisobotda.
Birlashgan Millatlar Tashkiloti aholisi eng tez qariyotgan mamlakatlarni o‘z fuqarolarining mehnat qobiliyatini oshirish, shu jumladan, uzluksiz o‘qitish, qayta tayyorlash va mehnat muddatini uzaytirish bo‘yicha choralar haqida o‘ylashga chaqirgan.
Izoh (0)