Buxoro shahri hokimligi “Boqiy Buxoro” madaniy etnografik parki o‘z o‘rnida barpo etilishini ma’lum qildi.
Ijtimoiy tarmoqlarda jamoatchilik eʼtirozlaridan keyin nihoyat “Boqiy Buxoro” loyihasi shahar chetida bunyod etiladigan bo‘lgani haqida xabarlar tarqaldi. Hokimlikka ko‘ra, ushbu xabarlar yolg‘on va haqiqatga to‘g‘ri kelmaydi.
Ta’kidlanishicha, “Boqiy Buxoro” madaniy etnografik parkini barpo etish ishlari tizimli amalga oshirilmoqda. Hozirda mazkur loyihani amalga oshirish maqsadida hududdagi eskirgan va avariya holatidagi bino va inshootlarning asosiy qismi to‘liq demontaj qilinib, qurilish maydoni 90 foizga tayyor holga keltirilgan.
Buxoro viloyatining sobiq hokimligi binosida ham demontaj ishlari aholiga va atrofdagi obyektlarga taʼsir etmagan holda texnik xavfsizlik qoidalariga muvofiq davom ettirilib, ishlar qariyb 70 foizga bajarilgan.
Shuningdek, “Boqiy Buxoro” madaniy etnografik parkini barpo etish loyiha hujjatlari taniqli tarixchilar, olimlar, madaniy meros sohasi mutaxassislari va xorijiy loyiha tashkilotlari bilan hamkorlikda yakuniga yetkazilmoqda.
Buxoro shahrida 2023-yilning yanvar oyida 33 gektar maydonda turizm markazi qurilishi jamoatchilik e’tirozlariga hamda keng muhokamalarga sabab bo‘lgan edi. Shuningdek, mazkur loyiha YUNESKO bilan kelishilmagani ma’lum qilingan edi. Shundan so‘ng mas’ullar bu hali loyiha ekanini, tegishli xulosasi olingan holda, yakuniy qaror qabul qilinishi va shundan so‘ng qurilish ishlari boshlanishini aytgandi.
Izoh (0)