Бухоро шаҳри ҳокимлиги “Боқий Бухоро” маданий этнографик парки ўз ўрнида барпо этилишини маълум қилди.
Ижтимоий тармоқларда жамоатчилик эътирозларидан кейин ниҳоят “Боқий Бухоро” лойиҳаси шаҳар четида бунёд этиладиган бўлгани ҳақида хабарлар тарқалди. Ҳокимликка кўра, ушбу хабарлар ёлғон ва ҳақиқатга тўғри келмайди.
Таъкидланишича, “Боқий Бухоро” маданий этнографик паркини барпо этиш ишлари тизимли амалга оширилмоқда. Ҳозирда мазкур лойиҳани амалга ошириш мақсадида ҳудуддаги эскирган ва авария ҳолатидаги бино ва иншоотларнинг асосий қисми тўлиқ демонтаж қилиниб, қурилиш майдони 90 фоизга тайёр ҳолга келтирилган.
Бухоро вилоятининг собиқ ҳокимлиги биносида ҳам демонтаж ишлари аҳолига ва атрофдаги объектларга таъсир этмаган ҳолда техник хавфсизлик қоидаларига мувофиқ давом эттирилиб, ишлар қарийб 70 фоизга бажарилган.
Шунингдек, “Боқий Бухоро” маданий этнографик паркини барпо этиш лойиҳа ҳужжатлари таниқли тарихчилар, олимлар, маданий мерос соҳаси мутахассислари ва хорижий лойиҳа ташкилотлари билан ҳамкорликда якунига етказилмоқда.
Бухоро шаҳрида 2023 йилнинг январь ойида 33 гектар майдонда туризм маркази қурилиши жамоатчилик эътирозларига ҳамда кенг муҳокамаларга сабаб бўлган эди. Шунингдек, мазкур лойиҳа ЮНЕСКО билан келишилмагани маълум қилинган эди. Шундан сўнг масъуллар бу ҳали лойиҳа эканини, тегишли хулосаси олинган ҳолда, якуний қарор қабул қилиниши ва шундан сўнг қурилиш ишлари бошланишини айтганди.
Изоҳ (0)