AQSH prezidenti Jo Bayden 3-iyul kuni o‘tkazilgan saylov kampaniyasi uchrashuvida prezidentlik poygasini tark etmasligini maʼlum qildi. Bu haqda Reuters prezident bayonotiga asoslanib xabar berdi.
Bayden o‘z siyosiy kampaniyasini “so‘ngiga qadar” davom ettirishini bildirgan. Salomatlikdagi muammolar yoki o‘z partiyasidagi eʼtirozlar uni fikridan qaytara olmasligini aytgan.
AQSH prezidenti Jo Bayden chorshanba kuni saylovoldi tashviqoti xodimlari bilan telefon muloqoti va Demokratlar partiyasidan tayinlangan qonunchilar hamda gubernatorlar bilan uchrashuvlar chog‘ida 2024-yilgi prezidentlik poygasida qolishga vaʼda bergan. Uning mansabga layoqatsizligi haqidagi xabarlarni ommaga “doston qilmaslik”ni so‘ragan.
“Hech kim meni ko‘ksimdan itarmayapti. Men ketmayman. Men bu poygada oxirigacha qatnashaman”, — degan Bayden.
Manbada aytilishicha, hozircha Baydenni qo‘llashi kutilgan 24 nafar shtat gubernatorlaridan faqat uchtasi — Nyu York, Minnesota va Merilend shtatlari rahbarlari amaldagi prezident bilan birdamligini eʼlon qilgan. Qolganlar esa Bayden salomatligi tufayli tez orada poygadan chiqishi mumkinligini taxmin qilib, prezidentni qo‘llashni rad etgan.
Baydenning yoshi va kognitiv salomatligi borasidagi xavotirlar Donald Tramp bilan debatdan so‘ng yuzaga keldi. Prezident debat jarayonida tushunarsiz nutq qilgan, fikrlari chalkashib ketgan.
Muvaffaqiyatsiz debat esa kuzatuvchilarning eʼtiroziga sabab bo‘lgan. Fuqarolarning ko‘pchiligi Baydenni keksalik tufayli vazifasida qolishga nomunosib deb topgan.
Izoh (0)