Isroil fuqarolarining 66 foizi mamlakat bosh vaziri Binyamin Netanyaxuning hokimiyatdan ketishini xohlaydi. Bu haqda 28-iyun kuni o‘tkazilgan so‘rovnoma natijalariga asoslanib, Anadolu xabar berdi.
Isroil aholisining uchdan ikki qismi bosh vazirning isteʼfosiga xayrixohlik bildirgan. Fuqarolar Netanyaxuning bosh vazir lavozimi uchun yangi muddatga nomzodini qo‘yishiga ham qarshi chiqmoqda.
So‘rovnomada qatnashganlarning ko‘pchiligi 74 yoshli Netanhaxuni agressiv siyosati va mamlakat hayotini izdan chiqargani uchun tanqid qilgan. Respondentlarning 27 foizga yaqinigina vazirning hokimiyatini qo‘llab-quvvatlagan.
Xuddi shu ko‘rinishdagi yana bir so‘rovnoma Isroilning Maariv gazetasi tomonidan o‘tkazilgan. Ushbu so‘rovnomada esa Milliy birlik partiyasi rahbari Benni Gantz bosh vazirlikka munosiblik reytingida Netanyaxudan ustun kelgan.
Binyamin Netanyaxuning bosh vazir sifatidagi faoliyati uning mansab vakolatlari muddati tugashi tufayli qonuniy asosga ega emas. Oldinroq BMT Xavfsizlik Kengashi vazirdan mamlakatda zudlik bilan saylovlar tashkil etishni talab qilgan edi. Isroil hukumati bu talabni eʼtiborsiz qoldirgan. Tel-Aviv rasmiylari HAMAS bilan ketayotgan urush tufayli saylovlarni tashkillashtirib bo‘lmasligini bildirgan.
Maʼlumot o‘rnida, Binyamin Netanyaxu Xalqaro sud tomonidan genotsidda ayblanmoqda. Sud Tel-Avivga murojaat yuborib, 6-may kunidan beri davom etayotgan Rafah operatsiyasini to‘xtatishni talab qilgan. Ammo Netanyaxu boshchiligidagi hukumat talablarni rad etgan edi.
Izoh (0)