Боливияда 26 июнь куни ҳарбийлар давлат тўнтариши ташкил этишга уринган. Бу ҳақда Лотин Америкаси манбаларига асосланиб, CNN нашри хабар берди.
Манбада айтилишича, чоршанба куни Боливия армияси қўмондони, генерал Хуан Хосе Сунига бошчилигидаги бир гуруҳ ҳарбийлар мамлакат раҳбариятига қарши исён ташкил этган. Ҳарбийлар қисқа муддатда президент саройи ва пойтахтнинг муҳим стратегик ва мудофаа объектлари атрофида ҳужумлар ташкил этган.
Боливия президенти Луис Арсе халқни демократияни ҳимоя қилиш учун “уюшиш ва ҳаракатга келишга” чақирган. Пойтахт Ла-Пасдаги ҳукумат биноларини ўраб олган исёнчи аскарлар ва зирҳли ҳарбий машиналар йўлини тўсишга, уларни ҳаракатдан тўхтатишга чақирган.
“Биз ҳарбий тўнтариш боливияликлар ҳаётини яна бир бор издан чиқаришига йўл қўйиб бера олмаймиз. Ҳукумат ҳаммани демократияни ҳимоя қилишга чақиради”, — деган президент Арсе давлат тўнтаришига уриниш бошланган пайтда президент қароргоҳида эълон қилган баёнотида.
Манбада айтилишича, исёнчи аскарлар миллий ижроия ва қонун чиқарувчи идоралар жойлашган Мурилло Плаза марказий майдонида асосий кучларини тўплаган. Кейинчалик айнан ушбу майдондан юборилган зирҳли машиналар президент саройига киришга уринган. Ҳодиса ҳақида Мамлакатнинг собиқ президенти Эво Моралес биринчилардан бўлиб хабар берган ва ҳарбий безовталанишини “тўнтариш” дея баҳолаган.
Мамлакат раҳбари мурожаати билан тинч аҳоли ҳарбийларга қарши норозилик билдириб кўчага чиққан. Пойтахтнинг марказий нуқталарида ҳарбийлар ва тинч аҳоли тўқнашуви юз берган.
Манбага кўра, ҳарбий ҳолат муносабати билан президент эълон қилган мурожаат оқибатида исёнчи ҳарбийлар орасида бўлиниш юз берган. Халқ билан қарама-қарши бўлишни истамаган армия гуруҳлари ўз позицияларини тарк эта бошлаган.
Боливия махсус операцион кучлари ҳали исён давом этаётган бир пайтда ғалаён ташкилотчиларини ҳибсга олиш учун операция бошлаган. Тадбир ўта муваффақиятли ташкил этилиб, тўнтариш ташкилотчиси, олдинроқ қўмондонликдан бўшатилган Хуан Хосе Сунига ҳибсга олиниб, полиция машинасида олиб кетилган.
Қўлга олинишидан олдин эълон қилган сўнгги мурожаатида Сунига исён мақсади демократияни тиклаш, мамлакатни қутқариш эканлигини айтган. Амалдаги ҳукуматни лаёқатсизликда айблаган. Сиёсий маҳбусларни озод қилишга ваъда берган.
“Биз демократияни тикламоқчимиз. Бу халқнинг келажаги йўқ, армия эса фарзандларимиз келажаги, халқимиз фаровонлиги ва тараққиёти ҳақида қайғуришга, жасорат кўрсатишга тайёр”, — деган Хуан Хосе Сунига.
Исён давом этаётган бир пайтда Боливия армиясининг янги тайинланган генерали Хосе Санчез барча қуролли гуруҳларга ҳаракатни тўхтатишни буюрган. Раҳбари қўлга олинган исёнчилар буйруққа бўйсуниб, шаҳар марказини тарк этган.
Боливияда давлат тўнтаришига муваффақиятсиз уринишдан сўнг уч нафар ҳарбий раҳбар қўлга олингани таадиқланган. Улар орасида генерал Хуан Хосе Сунигадан ташқари ҳарбий-ҳаво кучлари генерали Марсело Хавьер Сегарра ва вице-адмирал Хуан Арнес Салвадор ҳам бор. Уларнинг барчаси полиция бўлимига олиб кетилган.
Боливия Мудофаа вазири Эдмундо Новиллонинг сўзларига кўра, ҳукумат давлат тўнтаришига уринишдан сўнг мамлакат қуролли кучлари устидан тўлиқ назоратни сақлаб турибди.
Боливия Бош прокуратураси чоршанба куни кечқурун Зунигага қарши жиноий тергов бошлаган. Ла-Пасдаги воқеаларга алоқадор бўлган барча бошқа иштирокчилар ҳам текширилиши айтилган.
Изоҳ (0)