WikiLeaks asoschisi Julian Assanj Buyuk Britaniyadagi qamoqxonadan garov evaziga ozod qilindi. U o‘ziga nisbatan 18 ta ayblovdan birini tan olish bo‘yicha tergov bilan dastlabki kelishuvga erishgan. Bu haqda Deutsche Welle xabar berdi.
Assanj 24-iyun kuni ertalab Britaniyaning qattiq rejimdagi Belmarsh qamoqxonasidan chiqdi va Stansted aeroportida samolyotga o‘tirib, Avstraliyaga uchib ketdi. WikiLeaks (anonim manbalardan olingan yoki sizdirilgan maxfiy ma’lumotlarni nashr etadigan xalqaro notijorat tashkiloti) asoschisi 1901 kunni jazoni ijro etish muassasasida o‘tkazgan.
Washington Post va CNN sud hujjatlariga tayanib yozishicha, Assanj tergov bilan 18 ta ayblovdan biri bo‘yicha aybini tan olish uchun dastlabki kelishuvga erishgan. Kelishuv hali rasman yakunlangani yo‘q, deya ta’kidladi WikiLeaks. Yangi kelishuv shartlariga ko‘ra, AQSH Adliya vazirligi prokurorlari avstraliyalik ayblanuvchiga 62 oylik qamoq jazosini talab qiladi.
Julian Assanj ishi
AQSHda WikiLeaks asoschisi maxfiy ma’lumotlarni o‘g‘irlash, josuslik va kompyuter tarmoqlarini buzish bo‘yicha 18 ta moddada ayblanmoqda. Agar aybi isbotlansa, u 175 yilga ozodlikdan mahrum etilishi mumkin.
Vashingtonga ko‘ra, Assanj AQSHning Iroq va Afg‘onistondagi harbiy amaliyotlariga oid maxfiy materiallarni amerikalik askar Bredli Menningdan (keyinchalik jinsini o‘zgartirib, Chelsi Menningga aylantirgan) olgan. Amerikalik rasmiylar bu AQSH razvedka xizmati xodimlari hayotini xavf ostiga qo‘yganini aytmoqda.
Shu bilan birga, Assanj tarafdorlarining qayd etishicha, WikiLeaks saytida materiallar chop etilishi natijasida jamoatchilik Amerika askarlari tomonidan Yaqin Sharqda sodir etilgan jinoyatlar haqida ma’lumotga ega bo‘lgan.
Ekvador elchixonasidan boshpana
2012-yildan 2019-yilgacha Assanj zo‘rlash ishi bo‘yicha Shvetsiya tomonidan chiqarilgan Yevropa orderi bilan hibsga olinishidan qo‘rqib, Londondagi Ekvador elchixonasida panoh topgan. WikiLeaks asoschisi aybini tan olmagan va Shvetsiya uni AQSHga ekstraditsiya qilishi mumkinligini aytgan. Keyinchalik Shvetsiya adliya idoralari unga nisbatan dastlabki tergovni to‘xtatgan.
Izoh (0)